~~META:
title = Анатоль Вярцінскі — Гудзела, гуло ў маіх вушах...
&keywords = гуло, гудзела
&abstract = Чытаць верш Анатоля Вярцінскага "Гудзела, гуло ў маіх вушах..."
&iftrue = nan
~~

====== Анатоль Вярцінскі — Гудзела, гуло ў маіх вушах... ======
Гудзела, гуло ў маіх вушах.\\
Гудзела, гуло ва ўсім маім целе.\\
А з целам была заадно i душа —\\
суладна яны звінелі, гудзелі.\\
Як мора ў бераг,\\
так біўся той гул\\
ў мае барабанныя перапонкі.\\
І мроіўся белы, рамонкавы луг:\\
ад краю да краю бялелі рамонкі.\\
Гудзела, гуло ў маіх вушах.\\
Гуло і звінела ва ўсёй істоце.\\
Гуло на высокай пранізлівай ноце.\\
І я зразумеў —\\
о, шчасце! О, жах! —\\
што значыць той гул,\\
што значыць той луг.\\
Я быў улюбёны.\\
Я быў, як усе мы.\\
І я, як звяно,\\
уключаўся ў ланцуг\\
любові, яе ўсепланетнай сістэмы...

 


===== Падобныя старонкі =====
  * [[творы/анатоль-вярцінскі/анатоль-вярцінскі-гавары-са-мной-ласкава]]
  * [[творы/анатоль-вярцінскі/анатоль-вярцінскі-цётка-плакала-па-ўсім-]]
  * [[творы/анатоль-вярцінскі/анатоль-вярцінскі-аналіз-творчасці]]
  * [[творы/анатоль-вярцінскі/анатоль-вярцінскі-рэквіем-па-кожным-чацв]]
  * [[творы/анатоль-вярцінскі/анатоль-вярцінскі-медсястры]]