~~META:
title = Анатоль Вярцінскі — Акіян і лужына
&keywords = лужына, глядзеў, акіян, вал, бачыў
&abstract = Верш Анатоля Вярцінскага "Акіян і лужына"
&iftrue = nan
~~

====== Анатоль Вярцінскі — Акіян і лужына ======
Я сказаў:

«Акіян – вялікая лужына»

Як усхадзіўся акіян!\\
Маўляў, пакрыўдзілі незаслужана,\\
абразілі акіянскі сан.\\
Як загудзеў, зашумеў раз’юшана,\\
як пагнаў за валам вал:\\
«Я вам пакажу, якая я лужына!\\
Я болей прывык да од і пахвал!»\\
Я моўчкі глядзеў, як шалее стыхія,\\
і думаў са скрухай:

«Вялікі такі,

а крыўдзіцца гэтак жа, як і другія,\\
як дробныя лужыны і ручайкі».

*****

Я глядзеў, як хвалюецца лужына.\\
Бачыў я воблакаў караван,\\
бачыў у лужыне неба засмужанае.\\
– Лужына – мікраакіян.\\
Словы мае пачула лужына.\\
Лоб наморшчыла напружана\\
і пачала падрабляць свой зыб\\
пад акіянскую шыр і глыб.\\
Думала, што разлілася бязмежна,\\
што выйшла за берагі свае.\\
Я глядзеў і мне было смешна\\
і мне было сумна за яе.

 


===== Падобныя старонкі =====
  * [[творы/анатоль-вярцінскі/анатоль-вярцінскі-рэквіем-па-кожным-чацв]]
  * [[творы/анатоль-вярцінскі/анатоль-вярцінскі-аналіз-творчасці]]
  * [[творы/анатоль-вярцінскі/анатоль-вярцінскі-гавары-са-мной-ласкава]]
  * [[творы/анатоль-вярцінскі/анатоль-вярцінскі-цётка-плакала-па-ўсім-]]
  * [[творы/анатоль-вярцінскі/анатоль-вярцінскі-медсястры]]