~~META:
title = Анатоль Вялюгін — На плошчы Незалежнасці
&keywords = плошча, суботы
&abstract = Чытаць верш Анатоля Вялюгіна "На плошчы Незалежнасці"
&iftrue = nan
~~

====== Анатоль Вялюгін — На плошчы Незалежнасці ======
Ля хорама дзяржавы\\
Яліны і шынелі\\
На холадзе куржава\\
Дасвеццем заінелі.\\
\\
Здароў, сухі аўторак!\\
На сесіі сягоння\\
У ляманце разборак\\
Агніцца меч Пагоні.\\
\\
Ні меча, ні арала\\
Як след не браўшы ў рукі,\\
Гарлаюць генералы –\\
Акопнікаў унукі.\\
\\
А іх, штабных у зорках,\\
Што спрытна зарабілі, –\\
Як снегіроў на горкай\\
Аснежанай рабіне.\\
\\
Пасля крутой размовы\\
Аб мове і Расіі\\
Яны на час зімовы\\
Вакацый зноў прасілі.\\
\\
З аўторка да суботы\\
Пасля агнішча духу\\
На гойданках дрымоты\\
Дабрэла пасядуха.\\
\\
Сягоння ж ёй пабудка,\\
Парт-гвардыі Саветы, –\\
У сёдлах крэслаў пудка\\
Адкінуты газеты.\\
\\
На плошчу кліча плошча\\
Галосна а зубаста.\\
Калоціць залу пошчак\\
Прысуду плошчы:\\
– Баста!..\\
\\
Нямала ж перла бродам\\
Да вабных круч кар’еры,\\
Між імі і народам –\\
Міліцыі бар’еры.\\
\\
Не злічыш да суботы\\
Пад ветласцю жалезнай,\\
На колькі тысяч ботаў\\
Падкута незалежнасць.\\
\\
1994

\\
Літаратура і мастацтва. 1994, 29 красавіка.

 


===== Падобныя старонкі =====
  * [[творы/ніна-мацяш/ніна-мацяш-незалежнасць]]
  * [[творы/анатоль-вялюгін/анатоль-вялюгін-дзіва]]
  * [[творы/анатоль-вялюгін/творчасць-анатоля-вялюгіна]]
  * [[творы/анатоль-вялюгін/анатоль-вялюгін-сланечнік-з-прабітай-гал]]
  * [[творы/анатоль-вялюгін/анатоль-вялюгін-лета]]