~~META:
title = Аляксей Якімовіч — Падзяка
&keywords = тата, алесь, суніцы, выраслі, прыгуменні, гусі, патапталі
&abstract = Чытаць апавяданне Аляксея Якімовіча "Падзяка"
&iftrue = True
~~

====== Аляксей Якімовіч — Падзяка ======
На прыгуменні выраслі суніцы. Першым кусцікі суніц заўважыў малы Алесь.\\
– Тата, глянь! У нас нейкае новае зелле з’явілася. Я яго зараз вырву, – сказаў ён і рашуча накіраваўся да кволенькіх зялёненькіх кусцікаў.\\
– Не руш, Алесік, – спыніў тата. – Гэта суніцы. Хутка яны зацвітуць і парадуюць нас салодкімі духмянымі ягадамі.\\
Алесь нагнуўся каля кусціка і прыўзняў сцябліну, якая заканчвалася трыма тонкімі зубчатымі лісцікамі, падобнымі на незвычайныя сэрцайкі.\\
– Суніцы трэба абгарадзіць, каб гусі не патапталі, – прапанаваў тата.\\
Алесь і тата абгарадзілі сямейку суніц калочкамі і пайшлі ў хату.\\
Лагодныя вясеннія дзянькі прабягалі непрыкметна, як прабягаюць шчаслівыя імгненні.\\
Бавячыся, Алесь забыўся пра суніцы, што выраслі на прыгуменні.\\
Аднаго дня, раніцай, тата прынёс талерку, на якой ляжалі чырвоныя ягады.\\
– Частуйся суніцамі з прыгумення, сынок!\\
– Яны выраслі, не патапталі іх гусі! – усклікнуў Алесь і ўзяў з талеркі макраватую ад расы і туману ягаду. – Дзякуй табе, тата.

 


===== Падобныя старонкі =====
  * [[творы/алесь-якімовіч/алесь-якімовіч-вераб-ёвы-госці]]
  * [[творы/алесь-якімовіч/алесь-якімовіч-байка-пра-казла]]
  * [[творы/алесь-якімовіч/алесь-якімовіч-аладкі]]
  * [[творы/алесь-якімовіч/алесь-якімовіч-хітры-воўк]]
  * [[творы/алесь-якімовіч/алесь-якімовіч-аўтамат]]