~~META:
title = Аляксей Пысін — Туман
&keywords = скок, заяц
&abstract = Чытаць верш Аляксея Пысіна "Туман"
&iftrue = nan
~~

====== Аляксей Пысін — Туман ======
На кустах і на траве\\
Серабрацца густа росы,\\
Пара белая плыве,\\
Засцілае луг і плёсы.\\
\\
Свеціць месяц. На лужок\\
Заяц выскачыў з гушчару:\\
«Пабягу на беражок,\\
Хто развёў такую пару?»\\
\\
Скок ды скок ён напрасткі,\\
Блізкая дарога;\\
I спыніўся ля ракі,\\
Стаў, як ля парога.\\
\\
Дзівіцца адважны зай:\\
У гарлачыкаў на ўлонні\\
Жабяняты цёплы чай\\
П’юць са сподачкаў зялёных.\\
\\
Мчыцца заяц да палян,\\
Сам з сабою размаўляе:\\
– Знаю, ад чаго туман\\
Па-над рэчкаю бывае.\\
\\
1962 г.

Крыніца: Пысін А. Збор твораў. У 2 т. Т.2. Паэмы, творы для дзяцей, пераклады. – Мн.: Маст. літ., 1989. – 254 с.

 


===== Падобныя старонкі =====
  * [[творы/уладзімір-жылка/уладзімір-жылка-туман]]
  * [[ibdc.ped>туман]]
  * [[творы/васіль-быкаў/васіль-быкаў-у-тумане]]
  * [[ibdc.ped>першы-парушальнік]]
  * [[творы/аляксей-пысін/аляксей-пысін-забыта-многае-ў-жыцці]]