~~META:
title = Аляксей Пысін — Ручнікі
&keywords = ручнікі, ружы
&abstract = Чытаць верш Аляксея Пысіна "Ручнікі"
&iftrue = nan
~~

====== Аляксей Пысін — Ручнікі ======
Вышывала маці... У руках,\\
Як вясёлкі, ніткі мільгацелі.\\
Клаліся на белых ручніках\\
Роднай нівы фарбы і адценні.\\
\\
Расцвіталі ружы і ляны\\
Ў непаўторных веснавых узорах.\\
Упляталіся напевы, сны,\\
Промні сонца і далёкіх зорак.\\
\\
Дочкі і сыны ў жыццёвы шлях\\
Гэты дар – благаславенне бралі;\\
У партызанскіх баравых лясах\\
Ручнікі на ранах абгаралі;\\
\\
Тлелі пад снягамі і дажджом\\
На магільным помніку\\
Герою.\\
Сёння ў хатах многіх над Сажом\\
Ўзоры тыя ж зіхацяць зарою.\\
\\
На далёкім полі цаліны\\
Выцірае хлопец твар спацелы,\\
За паўсвета ў свет,\\
За край лясны\\
Ручнікі, як птахі, заляцелі.\\
\\
Крылы ільняныя... Ручнікі...\\
Ружы незавялыя і краскі...\\
Прыкладзешся вільгаццю шчакі,\\
Быццам матчыну адчуеш ласку.\\
\\
1956 г.\\


\\
Крыніца: Пысін А. Выбраныя творы. У 2-х т. Т. І. Вершы / [Прадм. Р. Бярозкіна]. – Мн.: Маст. літ., 1980. – 304 с.

 


===== Падобныя старонкі =====
  * [[ibdc.ped>ручнік-у-вясельных-абрадах]]
  * [[творы/авяр-ян-дзеружынскі/авяр-ян-дзеружынскі-наш-беларускі-ручнік]]
  * [[творы/максім-танк/максім-танк-расшытае-крыжыкамі]]
  * [[ibdc.ped>беларускі-ручнік]]
  * [[ibdc.ped>повязь-часоў-беларускі-ручнік]]