~~META:
title = Аляксей Пысін — Мой зялёны горад
&keywords = зялёны, горад, зямлі, навальніц, сосны, кварталы, вуліцы, разбіты, роўныя, ляглі, просекі
&abstract = Чытаць верш Аляксея Пысіна "Мой зялёны горад"
&iftrue = nan
~~

====== Аляксей Пысін — Мой зялёны горад ======
На кварталы роўныя разбіты,\\
Просекі, як вуліцы, ляглі.\\
Ліўнямі і росамі абмыты\\
Мой зялёны горад на зямлі.\\
\\
Сто паверхаў тут займаюць птахі,\\
Кожны сук тут песняю звініць.\\
Дуб і сосны – векавыя гмахі,\\
Не баяцца бур і навальніц.\\
\\
Навальніц і бур... У час той грозны,\\
Калі вораг напіраў сцяной,\\
Баранілі нас дубы і сосны\\
I прымалі разам з намі бой.\\
\\
На дамы, на новыя цымбалы\\
Звонкіх дрэў нямала мы ўзялі.\\
Высцілаюць баравыя шпалы\\
Не адну дарогу на зямлі.\\
\\
Мне ж мілей за ўсё дарога тая,\\
Што вядзе ў зялёны горад мой,\\
Дзе сяброўства з кожным дубам маю\\
I знаёмы з кожнаю сасной;\\
\\
Дзе з крыніцы б’е настой зуброўкі,\\
Дзе чарніцы, быццам вінаград.\\
Без пуцёўкі, без камандзіроўкі\\
Прыязджай сюды – і будзеш рад.\\
\\
Толькі не! Не дачнікам сюды я\\
У экспрэсе мчуся праз налі,\\
А наведаць дрэўцы маладыя,\\
Пажадаць, каб дужымі былі.\\
\\
...На кварталы роўныя разбіты,\\
Просекі, як вуліцы, ляглі...\\
Углядаецца ў прастор блакітны\\
Мой зялёны горад на зямлі.\\
\\
1957 г.\\


\\
Крыніца: Пысін А. Выбраныя творы. У 2-х т. Т. І. Вершы / [Прадм. Р. Бярозкіна]. – Мн.: Маст. літ., 1980. – 304 с.

 


===== Падобныя старонкі =====
  * [[творы/аляксей-пысін/аляксей-пысін-домскі-арган]]
  * [[творы/аляксей-пысін/аляксей-пысін-туман]]
  * [[творы/аляксей-пысін/аляксей-пысін-забыта-многае-ў-жыцці]]
  * [[творы/аляксей-пысін/творчасць-аляксея-пысіна]]
  * [[творы/аляксей-пысін/аляксей-пысін-пісьмо-птушак]]