~~META:
title = Аляксей Пысін — Забыта многае ў жыцці...
&keywords = даспявае, жыта
&abstract = Чытаць верш Аляксея Пысіна "Забыта многае ў жыцці..."
&iftrue = nan
~~

====== Аляксей Пысін — Забыта многае ў жыцці... ======
//Сцяпану Гаўрусёву//

\\
Забыта многае ў жыцці,\\
З дарогі змецена і змыта.\\
Мне ў жыта хочацца ўвайсці,\\
Мне вечнасцю здаецца жыта.\\
\\
Вазьму шурпаты каласок\\
На чуйным провадзе саломы –\\
I адзавецца мне здалёк\\
Мой продак – сейбіт незнаёмы;\\
\\
Жней невядомых галасы\\
Ўсплывуць над постаццю сухою.\\
Раскалыханы каласы\\
Густой паўдзённаю смугою.\\
\\
Тут даспявае пад смугой\\
Зліццё надзей, жаданняў сумесь.\\
Гудзе жытнёвы провад мой –\\
Часоў былых і новых сувязь.\\
\\
I даспявае далягляд\\
У трапяткім мембранным гуле.\\
Шукаюць рукі тых зярнят,\\
Каб нас таксама дзесь пачулі.\\
\\
1965 г.

\\
\\
Крыніца: Пысін А. Выбраныя творы. У 2-х т. Т 1. Вершы. / [Прадм. Р. Бярозкіна]. – Мінск: Мастацкая літаратура, 1980. – 304 с.

 


===== Падобныя старонкі =====
  * [[творы/аляксей-пысін/аляксей-пысін-домскі-арган]]
  * [[творы/аляксей-пысін/творчасць-аляксея-пысіна]]
  * [[творы/аляксей-пысін/аляксей-пысін-петрык-і-сонца]]
  * [[творы/аляксей-пысін/аляксей-пысін-пісьмо-птушак]]
  * [[творы/аляксей-пысін/аляксей-пысін-туман]]