~~META:
title = Алесь Якімовіч — Звяры нашых лясоў
&keywords = звяры, заяц, бабры
&abstract = Верш Алеся Якімовіча "Звяры нашых лясоў"
&iftrue = nan
~~

====== Алесь Якімовіч — Звяры нашых лясоў ======
Звер вядомы ён усім –\\
І старым і дзецям.\\
Футра цёплае на ім,\\
А завуць – **мядзведзем**.\\
\\
А гэта вось –\\
Рагаты **лось**\\
З сям’ёй сваёй уранку\\
Выходзіць на гулянку.\\
\\
Як дзяды, яны з бародамі,\\
Ходзяць цэлымі чародамі.\\
Проста дзіва – не звяры,\\
Называюцца – **зубры**.\\
\\
**Бабры** – спакойныя звяры;\\
Хвасты ў іх як лапаты.\\
Без тапароў і піл бабры\\
Сабе будуюць хаты.\\
Ля іх, нібы разбойніца,\\
За язем **выдра** гоніцца.\\
\\
На суку ў гушчары,\\
Распусціўшы кіпцюры,\\
**Рысь** і дні і ночы\\
За здабычай сочыць.\\
\\
Навастрыла вушы **ліска**,\\
Пачала ўглядацца:\\
Ці няма пажывы блізка –\\
Птушкі або зайца?\\
\\
Глядзіць **куніца** горка\\
На шуструю **вавёрку**:\\
За ёй куніца\\
Скакаць баіцца.\\
\\
Пад’еўшы ўволю жалудоў,\\
Па сцежцы лесавой\\
Ікластых чарада **дзікоў**\\
Ідзе на вадапой.\\
\\
Ну і рогі у **аленя**!\\
Метраў два яны – не меней.\\
Ад такой пагрозы\\
Уцякаюць козы.\\
\\
А гэта – не кот, не бабёр,\\
А самы звычайны **тхор**.\\
\\
**Воўк** на зайца\\
Вострыць зубы.\\
Уцякай, шарак,\\
Ад згубы!\\
\\
Не ласун **барсук**, о не!\\
Есць ён што папала.\\
Нават жабу праглыне,\\
Калі мышак мала.

 


===== Падобныя старонкі =====
  * [[творы/уладзімір-ягоўдзік/уладзімір-ягоўдзік-бабёр]]
  * [[творы/янка-маўр/янка-маўр-бунт-звяроў]]
  * [[творы/змітрок-бядуля/змітрок-бядуля-гаспадарка]]
  * [[ibdc.ped>выдрын-гасцінец]]
  * [[ibdc.ped>чаму-звяры-перасварыліся]]