~~META:
title = Алесь Якімовіч — Дапамога
&keywords = пеця, ваня, бегаць, ігнат, васільевіч, патрэбна, класе, хутчэй, дапамагаю, часта, слабак, мялешка
&abstract = Чытаць апавяданне Алеся Якімовіча "Дапамога"
&iftrue = nan
~~

====== Алесь Якімовіч — Дапамога ======
Стрымліваючы хваляванне, Пеця націснуў на званок. Дзверы расчыніліся, і ён убачыў высокага хударлявага мужчыну.\\
– Вы да мяне?\\
Пеця збянтэжыўся. Не чакаў гэтага «Вы».\\
– Вас Ігнатам Васільевічам зваць? Вы франтавік?\\
– Усё правільна, малады чалавек.\\
Пеця зусім разгубіўся.\\
– Я Пеця Сіняк. Сіняк-слабак у класе клічуць, – нечакана прызнаўся ён. – Гэта Ваня Мялешка прыдумаў...\\
Ігнат Васільевіч пасадзіў Пецю ў мяккае крэсла, сам сеў насупраць.\\
– Цябе, відаць, са школы прыслалі, каб дапамагаў мне, ветэрану.\\
– Ага, – кіўнуў галавою Пеця.\\
Ігнат Васільевіч усміхнуўся:\\
– А чаму цябе слабаком называюць?\\
Пеця апусціў вочы, пачырванеў да вушэй.\\
– Я самы слабы ў класе, бо часта хварэю... Вам, напэўна, не патрэбна мая дапамога?\\
– Патрэбна, Пеця, вельмі патрэбна, – сказаў Ігнат Васільевіч. – Ты хварэеш часта – бяда ў цябе. I мне кепска. Сэрца баліць. Дактары раяць бегаць. Але боязна аднаму. Давай разам бегаць.\\
– Зімою? – не паверыў Пеця. – Холадна ж!\\
– Хіба ты не хочаш мне дапамагчы?\\
Пеця ўздыхнуў і мусіў пагадзіцца:\\
– Добра. Няхай будзе па-вашаму.\\
Непрыкметна мінула зіма. Неяк у класе пачалі прыгадваць, хто як ветэранам дапамагае.\\
– Я Ігнату Васільевічу бегаць дапамагаю, – пахваліўся Пеця.\\
Ваня Мялешка засмяяўся:\\
– Слабак бегаць дапамагае!.. Ха-ха-ха...\\
Крыўдна стала Пецю. Скончыліся ўрокі, і ён, падышоўшы да Вані, гучна, каб усе чулі, сказаў:\\
– Давай навыперадкі паспрабуем. Пабачым, хто з нас слабак...\\
На школьны стадыён пайшлі ўсім класам.\\
– Колькі кругоў пабяжым? – запытаўся Пеця.\\
– І аднаго хопіць, – адмахнуўся Ваня.\\
Пабеглі. Вырваўся Ваня ўперад. Пеця за ім трымаецца, не адстае. Ваня хутчэй, і ён хутчэй. Перад апошняй павароткай рвануўся, ураз Ваню абагнаў. Ваня сышоў з бегавой дарожкі і напрасткі, праз школьны стадыён, дахаты падаўся.\\
А сябры абступілі Пецю, здзіўляюцца:\\
– Дзе ж ты гэтак бегаць навучыўся?\\
– Я ж вам казаў, што Ігнату Васільевічу бегаць дапамагаю. Хворы ён. Дактары параілі, каб бегаў. I я заўсёды побач з ім...

 


===== Падобныя старонкі =====
  * [[творы/алесь-якімовіч/алесь-якімовіч-хітры-воўк]]
  * [[творы/алесь-якімовіч/алесь-якімовіч-аладкі]]
  * [[творы/алесь-якімовіч/алесь-якімовіч-байка-пра-казла]]
  * [[творы/алесь-якімовіч/алесь-якімовіч-вераб-ёвы-госці]]
  * [[творы/алесь-якімовіч/алесь-якімовіч-аўтамат]]