~~META:
title = Алесь Салавей — Спі...
&keywords = Салавей, спі
&abstract = Чвтаць верш "Спі..." Алеся Салаўя
&iftrue = nan
~~

====== Алесь Салавей — Спі... ======
Ты адзін — усё-усенькае:\\
радасць, мукаў забыццё.\\
Немаўлё маё маленькае,\\
найсвятлейшае жыццё.\\
\\
Спі, мой сынку... Аргенцінаю\\
не злякае сябра-сон,\\
нешчасліваю гадзінаю\\
над табой не дзынкне ён.\\
\\
Гаварыць пачнеш — часінкай той\\
зможаш праўду сна ўяўляць.\\
Кажны рух твой новы, сынку мой,\\
будзе родным прамаўляць;\\
\\
не ўсміхнецца ні Бразіліі,\\
ні Алясцы, ні Канго...\\
Станьце ж, станьце, сны, ідыліяй\\
непадкупнага, свайго.\\
\\
Не крануць хай слыху ценькага\\
словы: Перу, Парагвай,\\
і няхай у снох маленькага\\
ажыве бацькоўскі край.\\
\\
1946\\
//На чужыне//

 


===== Падобныя старонкі =====
  * [[творы/алесь-салавей/алесь-салавей-лясы-узгоркі-паплавы]]
  * [[постаці/алесь-салавей]]
  * [[творы/алесь-салавей/алесь-салавей-гекзаметры]]
  * [[творы/алесь-салавей/алесь-салавей-пад-шэлесты-лісця]]
  * [[творы/алесь-салавей/там-на-пякельным-таку-дзе-цапамі-малоцяц]]