~~META:
title = Алесь Салавей — Пад шэлесты лісця
&keywords = Салавей, лісце, шэлест
&abstract = Чытаць верш Алеся Салаўя "Пад шэлесты лісця"
&iftrue = nan
~~

====== Алесь Салавей — Пад шэлесты лісця ======
Пад шэлесты лісця, пад ліпавы шум\\
прылёг я спачынуць душою.\\
Віхрацца, нітуюцца прывіды дум,\\
і сэрца не знае спакою.\\
\\
Лятуць мае думкі ў бязмежную даль,\\
бы хвалямі гнаныя чоўны.\\
То ў сэрца закрадзецца кволая жаль,\\
то крыўдаю злосць яго пройме.\\
\\
Здаецца, ляцеў бы магутным арлом,\\
каб толькі арліныя крылы,\\
імкнуўся б, маячыў туды напралом,\\
дзе жыцці кладуцца ў магілы.\\
\\
Я кінуў бы гнеўны праўдзівы свой кліч\\
пакрыўджаным злыднямі людзям:\\
«Даволі прад ворагам гнуцца нам ніц,\\
змагацца за іх больш не будзем!»\\
\\
Ды сілаў няма, каб узняцца увысь,\\
і голас мой там не пачуюць...\\
Ліецца на долы крывавая слізь,\\
і вораны смерць там вяшчуюць.\\
\\
У бой выступае нагальнікаў тлум,\\
адплату прыносіць крывёю.\\
Пад шэлесты лісця, пад ліпавы шум\\
не ведае сэрца спакою.\\
\\
1942

 


===== Падобныя старонкі =====
  * [[постаці/алесь-салавей]]
  * [[творы/алесь-салавей/алесь-салавей-лясы-узгоркі-паплавы]]
  * [[творы/алесь-салавей/алесь-салавей-гекзаметры]]
  * [[творы/алесь-салавей/там-на-пякельным-таку-дзе-цапамі-малоцяц]]
  * [[творы/алесь-салавей/алесь-салавей-спі]]