~~META:
title = Алесь Салавей — Маці сына чакае з вайны
&keywords = Салавей, вайна
&abstract = Чытаць верш Алеся Салаўя "Маці сына чакае з вайны"
&iftrue = nan
~~

====== Алесь Салавей — Маці сына чакае з вайны ======
Маці сына чакае з вайны\\
у пакрыўленай хатцы-вязніцы.\\
Без сыночка ёй доўгія дні,\\
прыйдзе ночка — матулі не спіцца.\\
\\
Ўецца думак дакучлівы рой,\\
без пары галава пасівела.\\
«Сынку родны, саколік ты мой,\\
што за доля цябе там сустрэла?\\
\\
Быццам колас забыты, адна\\
век старэчы я ўжо дажываю.\\
Людзі сеюць (настала вясна).\\
Ну, а я — балазе, што жывая...\\
\\
Хто мне вестку пра сына падасць?\\
Мо хіба толькі пушча ці зоры?\\
Я пыталася ў іх, ды ці раз,\\
толькі мне яны штось не гавораць...\\
\\
Ты прыйдзі, дарагі мой сынок,\\
паглядзі, як мне цяжка жывецца.\\
Не надоўга — то хоць на дзянёк,\\
мо суцішыцца боль майго сэрца».\\
\\
Безнадзейна, матуля, яго\\
клічаш ты на дзянёк хоць у госці:\\
ты не вернеш сыночка свайго,\\
як не вернеш свае маладосці.\\
\\
На прасторах далёкіх, чужых,\\
пад зялёнай пахілай ракітай,\\
на траве нежывы ён ляжыць\\
там, палаткай паходнай накрыты.\\
\\
А як смерці вянок над ім звіс,\\
і ў жыцці не было больш патрэбы —\\
раз астатні зірнуў ён увысь,\\
у бяздонне блакітнага неба.\\
\\
Зіхацела чырвоным агнём\\
брыльянціста-ружовае сонца.\\
Гэтак некалі сонечным днём\\
зіхацела на роднай старонцы.\\
\\
I прыпомніў, бядак, Беларусь,\\
дарагія палі, сенажаці,\\
травяністы луговы абрус...\\
I прыпомніў гаротную маці...\\
\\
Дык не кліч жа, матуля, яго,\\
да цябе ён не прыйдзе у госці:\\
ты не вернеш сыночка свайго,\\
як не вернеш свае маладосці...\\
\\
12.06.1942

 


===== Падобныя старонкі =====
  * [[творы/алесь-салавей/алесь-салавей-пад-шэлесты-лісця]]
  * [[творы/алесь-салавей/алесь-салавей-лясы-узгоркі-паплавы]]
  * [[творы/алесь-салавей/алесь-салавей-спі]]
  * [[постаці/алесь-салавей]]
  * [[творы/алесь-салавей/там-на-пякельным-таку-дзе-цапамі-малоцяц]]