~~META:
title = Алесь Салавей — Мала
&keywords = іскрыпка, маса, мала, шлях
&abstract = Чытаць тэрцыну Алеся Салаўя "Мала"
&iftrue = nan
~~

====== Алесь Салавей — Мала ======
Спытаюцца ў цябе трыбуны масаў:\\
чаму маўчыш так шмат і творыш мала?..\\
У свеце фарбаў радасных і красаў\\
\\
кальчэе з холаду зямная гала.\\
Ствары мелодыю вясны, музыка,\\
яшчэ й зайграй, каб маса не праспала\\
\\
світання прыйсцьнага. Ды пальцы – смыка\\
і струн іскрыпкі не краналі здаўна.\\
Не вобразы ў суладнасці вялікай,\\
\\
а злітыя ў адно – і флора, й фаўна\\
твой зрок заслоньвалі. Цягнуў ты лямку\\
кавалка хлеба дзённага бясслаўна\\
\\
і біўся ў пазачыненую клямку\\
кавадла й молата, рыдлёўкі й кіркі.\\
Ты меў адну прызначаную рамку –\\
\\
ублізь і ўдалеч, удаўжкі і ўшыркі –\\
мятлу, мяшкі з пшаніцаю ці соляй.\\
Згінаўся горб – і неба водбліск зыркі\\
\\
не мог, пануры, ты разгледзець болей.\\
...Прыгноблены і стомай, і змярканнем,\\
не цешаны дабром, хвалёнай воляй.\\
\\
сядаў тварыць, іграць. Ды парываннем\\
цябе натхняла Муза неахвотна.\\
О, лепш было маўчаць з убогім граннем.\\
\\
без сябра доўга плачучы маркотна,\\
без Бацькаўшчыны плачучы заўсёды...\\
Душа няўстрым пакутвала гаротна,\\
\\
сузорны шлях да вышняй насалоды\\
шукаючы ў празмерлівым гарэнні.\\
Натуга сіл падужвала нягоды –\\
\\
і захлыналася чуццё ў натхненні.\\
Ты йзноў сядаў. Сугучны хор бязлікі\\
гучаў у дыяментавым тварэнні.\\
\\
Тады ў акрыленых руках музыкі\\
іскрыпка валадарна, думна грала.\\
Луналі з крышталёвых тонаў зыкі –\\
\\
скупыя зыкі – іх было так мала.\\
\\
1952

 


===== Падобныя старонкі =====
  * [[творы/янка-сіпакоў/янка-сіпакоў-тэрцыны-пра-наручнікі]]
  * [[творы/алесь-салавей/алесь-салавей-восеньскія-тэрцыны]]
  * [[творы/рыгор-крушына/рыгор-крушына-тэрцыны]]
  * [[творы/алесь-салавей/алесь-салавей-о-не-ня-цёмным-воблакам-шп]]
  * [[слоўнік/тэрцына]]