~~META:
title = Алесь Разанаў — Стары горад
&keywords = стары, горад
&abstract = Чытаць версэт "Стары горад" Алеся Разанава
&iftrue = nan
~~

====== Алесь Разанаў — Стары горад ======
На ацішэлых падворках, ля гонты і чарапіцы, квітнее ружовы і белы бэз і асвятляе сваім цвіценнем, сваім разуменнем горад, што паглыбляецца ў даўніну.\\
Кашлаты дзядоўнік натоўпіцца каля паркана:\\
кожная лапушына — шаля,\\
кожная лапушына — голас,\\
кожная лапушына — далонь:\\
наноў разважае зялёнае веча, наноў узважвае думнае веча кошт смерці і кошт жыцця...\\
\\
Пакінулі апошнія жыхары свае дамы-мураванкі, свае драўляныя хаты з аканіцамі і ліштвой і ўсё, што мелі, што нажывалі, што памяталі, што снілі, пабралі ў пярэбары, у перасяленне, у новы кут...\\
Ды нехта ўсё роўна сюды вяртаецца неадольна,\\
нешта ўсё роўна тут, быццам колісь, жыве:\\
тут раптам зазвоняць званы трывожна,\\
зацокаюць раптам падковы па бруку,\\
раптам дзіця заплача,\\
раптам некага нехта пакліча, і той адгукнецца ў адказ...\\
Тут пласт на пласце, на падмурку — падмурак.\\
Тут свае таямніцы, свой радавод, свой лад.\\
Тут нешта тоіцца, нешта хаваецца, нешта ўхіляецца ад разгляду...\\
Падводзіцца да старога горада вузкакалейка.\\
Па старым горадзе ходзяць узброеныя патрулі.

 


===== Падобныя старонкі =====
  * [[творы/алесь-разанаў/алесь-разанаў-радзіма]]
  * [[творы/алесь-разанаў/алесь-разанаў-рагнеда]]
  * [[творы/алесь-разанаў/алесь-разанаў-вецер]]
  * [[творы/алесь-разанаў/алесь-разанаў-арышт-кастуся-каліноўскага]]
  * [[творы/алесь-разанаў/творчасць-алеся-разанава]]