~~META:
title = Алесь Разанаў — Парог
&keywords = Разанаў, парог
&abstract = Чытаць верш "Парог" Алеся Разанава
&iftrue = nan
~~

====== Алесь Разанаў — Парог ======
Парог урос у зямлю, струхлеў...\\
Я б'ю па парозе нагою — з яго сыплецца парахня.\\
Але гэткі ён толькі зверху, далей ён трывалы, далей ён моцны — і шашаль яго не стачыў, і цвіль яго не збуцвіла,\\
— О, яму безліч гадоў,— кажа брат— I высечаны ён з дрэва, якога цяпер няма ўжо, — са шчырага дрэва, і высечаны людзьмі, якіх гэтаксама няма...\\
Мы не ўваходзім у хату: у ёй жылі нашы дзяды, у ёй жылі прадзеды нашы, а мы стаім на парозе, на шчырым парозе, і адчуваем, што мы гэтаксама парог, да якога — няма нас, і пасля якога — няма...\\
Ёсць месца ў набытку і месца ў страты.\\
Дзе растлумачыцца чалавеку, хто ён такі?\\
Хаты чакаюць, што вернуцца людзі.\\
Пыл ацярушваецца на парозе.\\
Калі мы са светам — мы супраць свету,\\
калі мы з прыродай — мы супраць прыроды,\\
калі мы з родам — мы супраць роду...\\
Мінулае тоіцца ў змроку, будучыня — у светлыні.

 


===== Падобныя старонкі =====
  * [[творы/алесь-разанаў/алесь-разанаў-вецер]]
  * [[творы/алесь-разанаў/алесь-разанаў-арышт-кастуся-каліноўскага]]
  * [[творы/алесь-разанаў/творчасць-алеся-разанава]]
  * [[творы/алесь-разанаў/алесь-разанаў-радзіма]]
  * [[творы/алесь-разанаў/алесь-разанаў-рагнеда]]