~~META:
title = Алесь Разанаў — Карона
&keywords = карона, бацькі, брата, сястра, брат, падворак, ўкрасці, ўкралі, залатая, карону
&abstract = Чытаць версэт Алеся Разанава "Карона"
&iftrue = nan
~~

====== Алесь Разанаў — Карона ======
Уранні карона знайшлася, а ўдзень яе ўкралі.\\
Яна была залатая – і злыя суседзі зайздросцілі нашай хаце: за што ім даецца гэткае шчасце – яны такія ж, як мы.\\
\\
Маўчаць платы і вароты.\\
Перамяшчаюцца ўпотай цені.\\
Бацькі не знаходзяць ад роспачы месца: і хто мог падумаць, што за каронай сочаць...\\
\\
Я пералажу праз плот у суседскі, зарослы травой, падворак, дзе жылі калісьці брат і сястра.\\
Былі б яны сёння тут – я расказаў бы ім пра сваё няшчасце, якое магло стаць шчасцем, я расказаў бы ім пра карону, якую не ўпільнаваў.\\
\\
Але падворак глухі: няма ні сястры, ні брата.\\
Дзесьці, дзе зараз яны жывуць, таксама няма і мяне для іх.\\
Брат мае сястру, сястра мае брата, а я маю тое, кім ёсць.\\
\\
А ўжо гукаюць-шукаюць мяне бацькі па сядзібе нашай.\\
«Знайшлася ў другі раз карона, – кажуць яны. – Тая была залатая, а гэтая модная, але ўсё роўна карона, і зноў на тым самым месцы – у лебядзе... Золата ўкрасці зладзеі ўкралі, а ўкрасці карону саму не здолелі: вось яна...»\\
\\
\\
Крыніца: Разанаў А. Вастрыё стралы: Версэты, паэтычныя мініяцюры. – Мн.: Маст. літ., 1988. – 159 с.

 


===== Падобныя старонкі =====
  * [[творы/алесь-разанаў/алесь-разанаў-арышт-кастуся-каліноўскага]]
  * [[творы/алесь-разанаў/алесь-разанаў-радзіма]]
  * [[творы/алесь-разанаў/творчасць-алеся-разанава]]
  * [[творы/алесь-разанаў/алесь-разанаў-вецер]]
  * [[творы/алесь-разанаў/алесь-разанаў-рагнеда]]