~~META:
title = Алесь Разанаў — Дрэва
&keywords = дрэва
&abstract = Чытаць вершаказ "Дрэва" Алеся Разанава
&iftrue = nan
~~

====== Алесь Разанаў — Дрэва ======
Чалавек жыве ў хаце, дрэва жыве на сваім водрубе, але іхнія лёсы пароднены і паяднаны жыцці.\\
I калі жыццё аднаго адрываецца ад жыцця другога, то аднаму робіцца няўтульна і дрэнна, а другога падточвае верад: няўжо я жыву проста так, ні для кога, дарэмна?\\
\\
Дрэва ўсяго сябе аддае ў дарунак: калі яно цвіце — разлівае водар, калі зелянее — хавае ад спёкі, а потым, у верасні, і самую лістоту, якой яно ахіналася ў траўні, паволі раскідвае па наваколлі.\\
З дрэва — плады, з дрэва — дровы, але, можа, самае дарагое, што дрэва дае чалавеку, гэта сам — бескарыслівы і самаахвярны — спосаб давання: у ім — святло, у ім — хараство, у ім — здароўе.\\
\\
Чалавек ва ўсім давярае дрэву, а дрэва, што б ні здаралася з ім, усё дароўвае чалавеку.\\
Яно яго павадыр: яно ідзе са старажытнасці, з «дрэўнасці», і вядзе чалавека не ў пространь, дзе гаспадараць дарвінаўскія дэрываты, а ў праўду.\\
\\
I нават калі чалавек памірае, дрэва становіцца тым чаўном, у якім — разам з ім — ён выпраўляецца ў незваротнае вандраванне.

 


===== Падобныя старонкі =====
  * [[творы/алесь-разанаў/алесь-разанаў-радзіма]]
  * [[творы/алесь-разанаў/творчасць-алеся-разанава]]
  * [[творы/алесь-разанаў/алесь-разанаў-арышт-кастуся-каліноўскага]]
  * [[творы/алесь-разанаў/алесь-разанаў-вецер]]
  * [[творы/алесь-разанаў/алесь-разанаў-рагнеда]]