~~META:
title = Алесь Звонак — Радзіма
&keywords = Звонак, радзіма
&abstract = Чытаць санетны трыпціх Алеся Звонака "Радзіма"
&iftrue = nan
~~

====== Алесь Звонак — Радзіма ======
1

У світцы шэрай крочыць Лістапад...\\
Хоць і даўно ні лісціка на голлі,\\
А востра пахне яблыкамі сад\\
I збажыной прытомленае поле.\\
\\
Зямля мая! Асенні далягляд —\\
Туманаў пена ў неба у прыполе,\\
Міраж дарог, задумны шэпт прысад\\
І жаўталісце бронзавае доле...\\
\\
Цябе вачыма абягу угрунь,\\
Суздром здзіўленнем шчасным анямелы:\\
Дажджы вось толькі глуха прашумелі\\
\\
I праступіла ізумрудам рунь...\\
Здаецца, тонкі колер акварэлі\\
Паклаў мастак на палатняны грунт.

2

Якая веліч! Праз імжысты дым\\
Акрэсліць можа зрок абрысы даляў.\\
Напружанняў высокіх правады\\
Гудуць, як басавітыя цымбалы.\\
\\
А пад скупым праменнем гарады\\
Высвечваюць высотныя кварталы,\\
I галасы жыцця на ўсе лады\\
Гучаць на доўгай і кароткай хвалі.\\
\\
Я пазнаю, Радзіма, голас твой,\\
А ў ім высокай ноты урачыстасць,\\
А ў ім узлёт намераў самых чыстых\\
\\
У спалучэпні з яснай прастатой!\\
Высокі подзвіг твой, як сказ вячысты,\\
Увойдзе ў строй легендаю жывой!

3

Суровы век паклаў, хоць не знарок,\\
Маршчынкі часу на тваім абліччы,\\
А ўжо расце твой малады народ,\\
Той, што на подзвіг новы мужных кліча;\\
\\
Той, што ў нязнаны свет кіруе зрок\\
Праз частаколы формул таямнічых,\\
Той, што праклаў у бездань першы крок,\\
Ступіўшы першым смела ў век касмічны!\\
\\
Твой дух, Радзіма, ў ім заўжды жыве,\\
Дух працы, дух стваральнага гарэння,\\
Што, ідучы праз безліч пакаленняў,\\
\\
Сам не паддасца старасці павек,\\
Бо рыцар твой і збраяносец верны\\
Завецца простым імем Чалавек!\\
\\
1972

 


===== Падобныя старонкі =====
  * [[творы/максім-багдановіч/максім-багдановіч-санет-замёрзла-ноччу-ш]]
  * [[слоўнік/вянок-санетаў]]
  * [[творы/максім-багдановіч/максім-багдановіч-санет-паміж-пяскоў-егі]]
  * [[творы/янка-купала/янка-купала-для-зямлі-прадзедаў-маіх]]
  * [[слоўнік/санет]]