~~META:
title = Алесь Звонак — З табою памяць зрошчана...
&keywords = запомні, памяць, зрошчана
&abstract = Чытаць верш Алеся Звонака "З табою памяць зрошчана..."
&iftrue = nan
~~

====== Алесь Звонак — З табою памяць зрошчана... ======
З табою памяць зрошчана. Нявер’е\\
Хай пажаўцелым лісцем ападзе.\\
Губляе верасень залочанае пер’е\\
I ў пераддзвер’е восені вядзе.\\
\\
Няхай. А ты запомні пералівы\\
Апоўначы раптоўных бліскавіц,\\
Нясмелы стук усхваляванай слівы\\
У глухату закрытых аканіц.\\
\\
А ты запомні мяккі жнівень, лівень,\\
Раскат грымот, маланак апаяс...\\
Тады, і толькі, ты была шчаслівай,\\
Аб немагчымым марачы падчас.\\
\\
Запомні плач самотнае каліны\\
Слязамі лістападаўскіх завей,\\
Як сэрца – птах у кіпцях сакаліных –\\
Хацела роспач выклеваць з грудзей...\\
\\
Запомні расставанне без праводзін,\\
Свіст цягніка і доўгі шлях на ўсход,\\
Усё, усё, з чым быў з табой не згодзен,\\
I нават мой раптоўны адыход...\\
\\
Не, я не зрокся даўніх спадзяванняў,\\
Скрозь дым пранёсшы чыстату душы,\\
Дзе ўсё – парыў юнацкіх хваляванняў,\\
Дзе ўсё – імкненне да крутых вяршынь...\\
\\
Запомні, што над словамі маімі\\
Не ўладны забыцця пабляклы час:\\
Я сто разоў прайду слядамі тымі.\\
Дзе ты прайшла, быць можа, толькі раз!\\
\\
1953

 


===== Падобныя старонкі =====
  * [[творы/алесь-звонак/алесь-звонак-курапаты]]
  * [[творы/алесь-звонак/алесь-звонак-радзіма]]
  * [[творы/алесь-звонак/алесь-звонак-дагарэла-зара-ў-небакраі]]
  * [[творы/алесь-звонак/алесь-звонак-гарбуз]]
  * [[творы/алесь-звонак/алесь-звонак-мой-сад]]