~~META:
title = Алесь Гарун — Ідуць гады
&keywords = ідуць, гады, свеце, няведама, сонца, вядуць
&abstract = Чытаць верш Алеся Гаруна "Ідуць гады"
&iftrue = nan
~~

====== Алесь Гарун — Ідуць гады ======
Ідуць сабе гады, ідуць,\\
Бы карагод, бясконца,\\
Што ў небе зорачкі вядуць\\
Ля месяца, ля сонца.\\
Ідуць сабе гады, ідуць –\\
I чалавек за імі.\\
Куды цябе яны вядуць\\
I сцежкамі якімі?

«Няведама мне, скуль усё і што я;\\
Няведама мне сама сцежка мая,\\
Няведама мне, і куды я іду.\\
Пытання не маю, ці што там знайду,\\
Не ведаю жыцце, ці шчасце, ці не,\\
Пачалося гэта, браток, не на мне».

Ідуць гады, ідуць гады,\\
I з імі ўсё на свеце.\\
Сягоння ты, а йшлі дзяды,\\
А заўтра пойдуць дзеці.\\
Ідуць гады, і ты ідзеш\\
Ўздагонь за імі, з імі.\\
Нашто, скажы мне, ты жывеш\\
I з думкамі якімі?

«З аднэю я думкай у свеце жыву,\\
Настаўнікам ўзяўшы і лес і траву,\\
Крыніцы, і кветкі, і цемру, і свет,\\
I месяц, і зоры, і сонца прывет.\\
Прысуджаны шлях свой рабі дарагім,\\
Красуйся на радасць сабе і другім».\\
\\
1913\\


\\
Крыніца: Гарун А. Выбраныя творы. Уклад., прадм., камент. У Казберука. – Мн.: «Беларускі кнігазбор», 2003. – 448 с.

 


===== Падобныя старонкі =====
  * [[творы/максім-багдановіч/максім-багдановіч-жывеш-не-вечна-чалавек]]
  * [[творы/леанід-галубовіч/леанід-галубовіч-дзяцінства-пачынаецца-з]]
  * [[творы/сяргей-грахоўскі/сяргей-грахоўскі-бяссмерце]]
  * [[творы/алесь-гарун/алесь-гарун-жыццё]]
  * [[творы/сяргей-грахоўскі/сяргей-грахоўскі-казкі-жыцця]]