~~META:
title = Алесь Гарун — Юдам
&keywords = Гарун, Юдам
&abstract = Чытаць верш "Юдам" Алеся Гаруна
&iftrue = nan
~~

====== Алесь Гарун — Юдам ======
Да вас, паны, што голасна крычыце\\
Аб прыязні сваёй да «беднага народу»,\\
Што раіце па-ліссяму: «Маўчыце,\\
Нядоўга вам дамо багацтва, волю, згоду», —\\
Да вас мой гэты верш і словы ўсе благія,\\
Бо словам вы адны, а справамі — другія.

«Багацтва вам»... Няма вам нашай веры!\\
Бо ў той жа год ліхі, як ў полі не ўрадзіла,\\
Галоднаму на прокарм хлеба меры\\
Аднэй не далі вы. I злаялі няміла...

Калі для нас жадаеце багацтва,\\
Нашто з бяздольнага здзіраеце апратку?\\
Нашто ж тагды вы плодзіце жабрацтва,\\
Дамы пустошачы без ліку, без астатку?

«Мы волю вам»... Пракляцце вам і з ёю!\\
Чаму ад волі вашай мы стагнаць павінны?\\
Яна ланцуг над нашаю зямлёю;\\
Астрог на наш народ, спакойны і бязвінны.

Не воля гэта! Што нам ні цвярдзіце,\\
Мы вольнымі былі за даўнімі часамі.\\
Ідзіце ж проч! I з воляю ідзіце!\\
Да волі знанае хутчэй мы прыйдзем самі.

«Мы згоду вам»... Пакіньце ашуканства!\\
Вы — бойкі братняе чарнейшыя прарокі,\\
Без звады вам, нашэптаў, падтыканства\\
Нямілы божы свет, не ясны, не шырокі.

Не просім вас! Не трэба вашай згоды!\\
Сваё вялікае дзядоўскае багацце\\
Хаваем мы; ад Бога ўсе народы\\
I бацькі аднаго ўсе дзеці—людзі, брацця.

Адкуль вы к нам? Чыйго племя і роду?\\
З якіх краёў прыйшлі без праўды і без сэрца?\\
I што вам з нас, ад нашага народу?\\
Чаму так жычыце яму хутчэй памерці?

Га! Знаем вас, атручання найміты:\\
Вы — служкі чорныя Яснейшага Мамона*,\\
Вы — мора бруд ля берагу намыты;\\
Без дум і без мазгоў, вы — золата без звона.

З усіх бакоў на послугі уціску\\
Чаргою воўчаю з'яўляецесь усюды,\\
Дзе клічуць вас для крыўды, для націску\\
На праўду вечную... Вы... імя вам Іуды!

Ідзіце ж проч! Бясплодна ваша трата\\
На ласкі ліссія. Пакіньце слова «брат»!\\
Вы цяжкі сон. Каты... Вы горай ката!\\
Кругом праклятыя, вам бацька, брат — дукат!

\\
1913\\
\\
* Яснейшага Мамона — тут у значэнні «Бога багаццяў»

 


===== Падобныя старонкі =====
  * [[творы/алесь-гарун/алесь-гарун-мае-думкі]]
  * [[творы/алесь-гарун/алесь-гарун-восень]]
  * [[творы/алесь-гарун/алесь-гарун-брацця-досыць-цярпець-нам-і-]]
  * [[творы/алесь-гарун/алесь-гарун-ветру]]
  * [[творы/алесь-гарун/алесь-гарун-у-чатырохлецце-нашае-нівы]]