~~META:
title = Алесь Гарун — Начныя думкі
&keywords = Гарун, думкі
&abstract = Чытаць верш Алеся Гаруна "Начныя думкі"
&iftrue = nan
~~

====== Алесь Гарун — Начныя думкі ======
Часам я ўночы сны дзіўныя бачу:\\
Роіцца нейкі нязведаны край,\\
Повен то шчасця, то жаласці, плачу,\\
То зло-хмурлівы, то светлы, як рай.\\
\\
Бачу вялікія стэпы з-над Нёмна;\\
Туліць у слёзах матуля сынка;\\
Сцелецца пушча глухая і цёмна;\\
Косці з магілы глядзяць бедака...\\
\\
Бачу я: жоўтае жытняе поле\\
Коласам ціха шуміць-шалясціць;\\
Межы, курган векавечны і хвоя;\\
Каня з аднэю малітваю "піць".\\
\\
Траўка ў ляску ў цяню вырастае,\\
Корміцца сокам зямелькі сырой;\\
Птушка шчабеча – людзей пацяшае;\\
Льецца крынічка, плюскоча вадой.\\
\\
Ночкай ля рэчкі раздольна, прывольна!\\
Гуртам русалкі смяюцца, пяюць,\\
Кветкі купальскай шукае бяздольны;\\
З зеллем шаптухі паціху снуюць...\\
\\
Хочацца быць мне ў тым краю нязнаным,\\
Хочацца край той абняць з прастаты,\\
Хочацца крыкнуць: гэй, краю каханы,\\
Будзь мне, як маці, будзь родным мне ты!\\
\\
Дай мне зрабіцца крынічкай лясною,\\
Бераг вадой абмываць, цалаваць;\\
Дай мне век цэлы дружыці з табою,\\
Хвойкі і зоры ў сабе адбіваць.\\
\\
Дай мне купальскую кветку ў рукі,\\
Путы жалезныя мне развяжы,\\
Дай ты мне зелля на гора і мукі,\\
К шчасцю гасцінец мне дай, пакажы!\\
\\
Ціха. Нічога не чую, не бачу.\\
Роіцца толькі нязведаны край,\\
Повен то шчасця, то жаласці, плачу,\\
То зло-хмурлівы, то светлы, як рай...\\
\\
1908

 


===== Падобныя старонкі =====
  * [[ibdc.ped>святло-радзімы]]
  * [[ibdc.ped>свой-край]]
  * [[ibdc.ped>мой-край]]
  * [[творы/авяр-ян-дзеружынскі/авяр-ян-дзеружынскі-я-спяваю-ты-спявай]]
  * [[творы/васіль-зуёнак/васіль-зуёнак-будучыня]]