~~META:
title = Алесь Гарун — Матчын дар
&keywords = Гарун, матчын, дар
&abstract = Чытаць верш "Матчын дар" Алеся Гаруна
&iftrue = nan
~~

====== Алесь Гарун — Матчын дар ======
Як радзіла маці мяне ў цёмну ночку,\\
Дык дала скрыпіцу: «На, іграй, сыночку!\\
Грай сабе на шчасце, грай на добру долю,\\
Грай на век даўгуткі, грай на вольну волю».\\
Помню, дзіцянёткам з тугой я не знаўся,\\
Жыў, як тая птушка, граў і забаўляўся;\\
Дзень мне быў спакойны, ўночы сон бязгрэшны,\\
А цяпер застаўся я навек няўцешны.\\
Ой, чаму ж, матуля, жыцце-скрыпку дала,\\
Як іх шанаваці дый не навучала?\\
Гэта ж падзівіся — я адкрыцца мушу,\\
Што сапсуў скрыпіцу, што згубіў я душу.\\
Здаўна, сівакрыла, шчасця я не маю,\\
Долі я не бачу, радасці не знаю.\\
Граю, праўда! граю... А на сэрцы важка,\\
А у сэрцы больна, аж трываці цяжка.\\
Тыя не прыходзяць песні-весялушкі,\\
Як пяе зямліца, як шчабечуць птушкі.\\
Жаль з нудой заплачуць, глуха як зайграю...\\
Маю я скрыпіцу, а душы — не маю!

\\
1913

 


===== Падобныя старонкі =====
  * [[творы/алесь-гарун/алесь-гарун-брацця-досыць-цярпець-нам-і-]]
  * [[творы/алесь-гарун/алесь-гарун-у-чатырохлецце-нашае-нівы]]
  * [[творы/алесь-гарун/алесь-гарун-мае-думкі]]
  * [[творы/алесь-гарун/алесь-гарун-ветру]]
  * [[творы/алесь-гарун/алесь-гарун-восень]]