~~META:
title = Алесь Гарун — Мае думкі
&keywords = Гарун, думкі
&abstract = Чытаць верш Алеся Гаруна "Мае думкі"
&iftrue = nan
~~

====== Алесь Гарун — Мае думкі ======
Па-на горах снягі паляглі,\\
I даліны ўбраліся ў белі.\\
Мае ж думкі, як толькі маглі,\\
Хутка з ветрам удаль паляцелі.\\
\\
Паляцелі ўдаль, дзе няма\\
Гэтых гор – вартаўнічых няволі,\\
Дзе не гэтак сурова зіма,\\
Дзе прыняў я і жыцце і долю.\\
\\
Паляцелі спытаць, паглядзець −\\
Як жывецца на роднай старонцы?\\
Як той брат-беларус мой жывець?\\
Ці высока ўзнялася сонца?\\
\\
Там жа ўсё, як раней, як было:\\
Беднасць, ціша кругом і цямнота.\\
Дзе там шчасце! Жыццё зацвіло,\\
Як наверсе якое балота.\\
\\
Сонца нізка – не грэе саўсім\\
I саўсім жа не свеце без мала;\\
Раз блісне дзе-нідзе – і паўсім,\\
I зноў сваю твар захавала.\\
\\
Колькі ж будзеш ты спаць? Не пара\\
Табе часам, мой браце, праспацца,\\
Каля бацькаўскіх ніў і двара\\
Працаваці зноў шчыра ўзяцца?\\
\\
I усё, што ўтраціў сплючы,\\
Пазбіраці да роднае хаты?\\
Годзе спаць! I не будзе начы,\\
Будзеш вольны, разумны, багаты!\\
\\
I высокае слонца тагды\\
Будзе працу тваю аглядаці,\\
I пазбудзешся крыўд і нуды,−\\
Будуць людзі цябе шанаваці.\\
\\
1910

 


===== Падобныя старонкі =====
  * [[творы/тарас-шаўчэнка/тарас-шаўчэнка-думка]]
  * [[творы/францішак-багушэвіч/францішак-багушэвіч-думка]]
  * [[творы/алесь-гарун/алесь-гарун-начныя-думкі]]
  * [[творы/алесь-гарун/алесь-гарун-у-чатырохлецце-нашае-нівы]]
  * [[слоўнік/думка]]