~~META:
title = Алесь Гарун — Добрыя дзеці
&keywords = дзеткі, злавілі, няволі, дзеці
&abstract = Чытаць верш Алеся Гаруна "Добрыя дзеці"
&iftrue = nan
~~

====== Алесь Гарун — Добрыя дзеці ======
Паставілі дзеці сіло. Вераб’я\\
Хацелі злавіць на пацеху,\\
Злавілі сініцу, крычаць: – Вой-я-я!\\
А радасці колькі, а смеху!

Імчацца да маткі: – Сінічка, глядзі!\\
– А дзе ж вы узялі? – Злавілі,\\
Дастань ты ёй клетку, хутчэй пасадзі.\\
– Нядобра вы, дзеткі, зрабілі!

– Мы будзем яе і паіць і карміць,\\
Спявала б нам птушка прыгожа.\\
– Ах, дзеткі! ў няволі яна замаўчыць,\\
Спяваць у няволі не можа...

Успомніце толькі, як нудна сядзець,\\
Як з хаты мароз не пушчае.\\
То ж дзень, вам здаецца, як тыдзень ідзець,\\
Хоць я і усяк разважаю.

А птушку вы хочаце з хаткі яе\\
Узяць, пасадзіць у чужую...\\
Не мучце, пусціце, рыбулькі мае.\\
На волю яе залатую.

I матчыны словы у сэрцах дзяцей\\
Ласкавыя струны кранулі.\\
I добрыя дзеці – прыклад для людзей! –\\
Сініцы свабоду вярнулі.\\


\\
Крыніца: Гарун А. Выбраныя творы. Уклад., прадм., камент. У. Казберука. Мн.: «Беларускі кнігазбор», 2003. – 448 с.

 


===== Падобныя старонкі =====
  * [[творы/янка-брыль/раман-янкі-брыля-птушкі-і-гнёзды-вобраз-]]
  * [[творы/янка-брыль/птушкі-i-гнёзды-сцюдзёны-вырай-аповесць-]]
  * [[творы/янка-брыль/птушкі-i-гнёзды-гнёзды-за-дымам-аповесць]]
  * [[ibdc.ped>птушкі-шчасця]]
  * [[творы/янка-брыль/увесь-свет-адзін-дом-па-раману-янкі-брыл]]