~~META:
title = Алесь Гарун — Дзяўчаці
&keywords = Гарун, дзяўчаці
&abstract = Чытаць верш Алеся Гаруна "Дзяўчаці"
&iftrue = nan
~~

====== Алесь Гарун — Дзяўчаці ======
Цябе спаткаў і сам не знаю,\\
Ад сэрца шчырага кажу,\\
Якую, дзеўча, думку маю\\
I спеў аб тым які злажу.

Здаецца, нешта ўскаланула\\
У душы маёй ты неўзнарок,\\
Былога струны закранула, —\\
Звіняць ледзь чутна аддалёк.

Ці ж будзе час, што нам спаткацца\\
Яшчэ раз здарыцца калі\\
I струны сэрца разбрымяцца\\
У тыя песні, што былі?

Ніхто не скажа! Толькі знаю\\
I не ўтаюся ад цябе:\\
Няхай цябе я не спаткаю, —\\
Пакінеш след ты па сабе.

I ў час, калі гадзінай шарай,\\
Сярод бязлюддзя, пустаты,\\
Нуда абляжэць чорнай хмарай,\\
Праменнем сонца будзеш ты!

 


===== Падобныя старонкі =====
  * [[творы/алесь-гарун/алесь-гарун-брацця-досыць-цярпець-нам-і-]]
  * [[творы/алесь-гарун/алесь-гарун-у-чатырохлецце-нашае-нівы]]
  * [[творы/алесь-гарун/алесь-гарун-восень]]
  * [[творы/алесь-гарун/алесь-гарун-мае-думкі]]
  * [[творы/алесь-гарун/алесь-гарун-ветру]]