~~META:
title = Алесь Гарун — Восень
&keywords = Гарун, восень
&abstract = Чытаць верш Алеся Гаруна "Восень"
&iftrue = nan
~~

====== Алесь Гарун — Восень ======
Восень халодная, чорная, хмурая\\
Сунецца ціха,нячутна штодзень,\\
Хварбы наўкола паклала панурыя,\\
Сонца хавае за чорную цень.\\
\\
Збожжа пажатае з ніваў пазвожана, −\\
Голыя гоні самотна ляжаць,\\
Неба дажджліваю хмарай абложана,\\
Траўкай не грае сваёй сенажаць.\\
\\
Кветкі не свецяць галоўкамі яснымі;\\
Кусцце без лісту, без красак стаяць;\\
З гэтымі восені днямі бяскраснымі\\
Цяжкія думкі ў сэрца ляцяць.\\
\\
Вольхі, рабіны, асіны з бярозамі\\
Лістам пажоўклым тужліва шумяць:\\
"Хутка надыдуць завеі з марозамі,\\
Ветры з снягамі ізноў наляцяць".\\
\\
Толькі высокія хвоі іглістыя\\
Вечназялёны свой кажуць убор.\\
Днямі зімовымі, цёмна-імглістыя,\\
Будуць чарнець навакол, наузгор.\\
\\
Зіму пачуўшы, мядзведзь неспакоіцца,\\
Ходзіць па лесе, шукае бярлог,\\
Хмурны і злосны, пакуль супакоіцца,\\
Горш на скаціну, на людзі налёг.\\
\\
Гусі і качкі гуртамі збіраюцца;\\
Хутка на поўдзень саўсім паляцяць.\\
Хеўра за хеўрай на рэчцы змяняецца;\\
Ўранку крычаць на вадзе, лапацяць.\\
\\
Так непрыкметна часамі, дзянёчкамі\\
Восень змяняе аблічча зямлі...\\
З гэтымі днямі асеннімі, ночкамі\\
Думкі мне ў сэрца жудосны прыйшлі.\\
\\
Старое нешта ўсё спамінаецца,\\
Толькі няясна, маўляў, праз туман,\\
Нейкі няведамы жаль уздымаецца,\\
Вабіць і цягне ўспамінак-дурман.\\
\\
Сэрца баліць пад жаданняў прымусамі,\\
Што за жаданні – ніяк не пазнаць;\\
Можа, ляцеці адгэтуль за гусямі...\\
Можа, заснуць, каб нічога не знаць?..\\
\\
1910

 


===== Падобныя старонкі =====
  * [[творы/алесь-гарун/алесь-гарун-у-чатырохлецце-нашае-нівы]]
  * [[творы/алесь-гарун/алесь-гарун-ветру]]
  * [[творы/алесь-гарун/алесь-гарун-брацця-досыць-цярпець-нам-і-]]
  * [[творы/алесь-гарун/алесь-гарун-начныя-думкі]]
  * [[творы/алесь-гарун/алесь-гарун-мае-думкі]]