~~META:
title = Алесь Бачыла — Цябе мы назвалі Радзімай
&keywords = зямля, годам, скарб, вякі, прынялі, лугам, бугам, дняпром
&abstract = Верш Алеся Бачылы "Цябе мы назвалі Радзімай"
&iftrue = nan
~~

====== Алесь Бачыла — Цябе мы назвалі Радзімай ======
Дзе рэчкай, дзе борам, дзе лугам\\
Ты вабіш сабою здаля,\\
Зямля між Дняпром і між Бугам,\\
Спрадвечная наша зямля.\\
\\
Цябе мы назвалі Радзімай\\
Не годам раней, не двума,\\
Не годам-двума прынялі мы\\
Тваё дарагое імя.\\
\\
З тых дзён і па сёння прадвеснем\\
Па нівах і ціхіх гаях\\
Гучыць твая звонкая песня,\\
Пявучая мова твая.\\
\\
І нам нездарма аддавалі,\\
Як скарб запаветны зямлі,\\
Каб мы − праз вякі шанавалі,\\
Каб мы − праз вякі бераглі.\\
\\
Калі ж гэты скарб чужаніца\\
Панішчыць захоча ў агні,\\
Каму ж, як не нам, заступіцца,\\
Каму ж, як не нам, бараніць.\\
\\
Табе прысягалі ў жыцці мы,\\
За вернасць пад кулі ішлі\\
Мы самі цябе, як Радзіму,\\
У сэрцы свае прынялі.\\
\\
Шырокімі нівай і лугам\\
Пад сонцам цвіці ж, як цвіла,\\
Зямля між Дняпром і між Бугам,\\
Любімая наша зямля.

 


===== Падобныя старонкі =====
  * [[творы/алесь-бачыла/алесь-бачыла-радзіма-мая-дарагая]]
  * [[ibdc.ped>скарбы-нашай-радзімы]]
  * [[творы/янка-купала/тэма-народнага-жыцця-і-любоў-да-радзімы-]]
  * [[ibdc.ped>ганарымся-бацькаўшчынай]]
  * [[творы/алесь-разанаў/алесь-разанаў-радзіма]]