~~META:
title = Алесь Бачыла — Упарты Стась
&keywords = стась, есці, долу
&abstract = Верш Алеся Бачылы "Упарты Стась"
&iftrue = nan
~~

====== Алесь Бачыла — Упарты Стась ======
Кепскі нораў – горш прастуды...\\
Знаравіўся раптам Стась.\\
Клічуць есці – ён:\\
– Не буду!..\\
– Дык хоць з грушы долу злазь.\\
– Не жадаю долу лезці! –\\
I... уверх сукоў на пяць.\\
– Дык скажы: няўжо ж і есці\\
аж на грушу падаваць? –\\
ушчувае сына маці.\\
Просіць злезці меншы брацік.\\
Стась і вокам не міргне –\\
а мармыча «не» і «не».\\
Дзе ж такому хто ўнаровіць!\\
Дый навошта наравіць?\\
Лепш яго на ўласным слове\\
нам адразу падлавіць.\\
– Не адхопіш новай двойкі?\\
Не пачнеш у школе бойкі?\\
Не ўцячэш з урока спеваў?\\
Не палезеш больш на дрэва?\\
Не напішаш на сцяне?\\
Ён на ўсё адказваў «не!».\\
Дзіва стала з чалавекам –\\
не пазнаць былога «неку».\\
Ані двоек,\\
ані боек,\\
шыбы цэлыя ў акне,\\
сцены чысценькія...\\
Во як\\
памагло адмоўе «не».

 


===== Падобныя старонкі =====
  * [[творы/алесь-бачыла/алесь-бачыла-колькі-кот-набіў-пасуды]]
  * [[творы/алесь-бачыла/алесь-бачыла-мама]]
  * [[творы/алесь-бачыла/алесь-бачыла-наказ-маці]]
  * [[творы/алесь-бачыла/алесь-бачыла-матчына-мова]]
  * [[творы/алесь-бачыла/алесь-бачыла-радзіма-мая-дарагая]]