~~META:
title = Алесь Бачыла — Матчына мова
&keywords = маці, народа
&abstract = Чытаць верш Алеся Бачылы "Матчына мова"
&iftrue = nan
~~

====== Алесь Бачыла — Матчына мова ======
Жывое ў вяках беларускае слова –\\
Народа душа і народа хвала.\\
Цябе абзывалі «мужыцкаю мовай»,\\
А нам жа ты матчынай мовай была.\\
\\
І самай прыгожай, і самаю мілай,\\
Той маці, што шыла нам світкі з радна,\\
Што ўлетку на рэчцы палотны бяліла,\\
А ўвосень авёс дажынала адна.\\
\\
Той маці, што зімамі кросны снавала,\\
Што з самай калыскі, як толькі магла,\\
Сумленнасці, праўдзе, дабру навучала,\\
Старанна ад розных хвароб берагла.\\
\\
Прыеду дадому... І што за праява...\\
Пачую гаворку, ці песню, ці верш –\\
Здаецца са мной размаўляеш ласкава,\\
І сцежкаю поруч са мною ідзеш.\\
\\
У маках чырвоных гарыць прыгуменне...\\
О матчына мова! Маленства вясна!\\
Ніколі ніхто мне цябе не заменіць,\\
Бо ты, як і маці, на свеце адна.

 


===== Падобныя старонкі =====
  * [[слоўнік/вершаваная-мова]]
  * [[слоўнік/мова-мастацкай-літаратуры]]
  * [[слоўнік/літаратурная-мова]]
  * [[слоўнік/аўтарская-мова]]
  * [[слоўнік/няўласна-простая-мова]]