~~META:
title = Алесь Бачыла — Мама захварэла
&keywords = мама, масла, тата, выклікаць
&abstract = Верш Алеся Бачылы "Мама захварэла"
&iftrue = nan
~~

====== Алесь Бачыла — Мама захварэла ======
Дзень халодны быў,\\
З дажджамі...\\
І прастыла моцна мама.\\
Разрывае кашаль грудзі,\\
Пот праймае, ные бок.\\
Мама ў роспачы:\\
– Што ж будзе?\\
Хто паможа нам, сынок?\\
Сходзіць хто па хлеб у краму,\\
Масла купіць, малака?..\\
Трэба спешна тэлеграмай\\
З БАМа\\
Тату выклікаць...\\
Я ў трывозе: «Як жа тату\\
Выклікаць? Няблізка ж БАМ...\\
Ды і ён жа там заняты...\\
Можа, спраўлюся я сам?»\\
І прашу я маму:\\
– Мама,\\
Не давайце тэлеграму.\\
Буду я ва ўсім памочнік.\\
Трэба: хату прыбяру,\\
Кашу з маслам, суп малочны\\
Найсмачнейшыя звару.\\
Хопіць розуму і ўмення,\\
Каб умомант, без турбот\\
Згатаваць яшчэ пельмені\\
Ці на трэцяе – кампот.\\
Не маленькі ж – і па лекі\\
Збегаць здолею ў аптэку...\\
\\
Мама ўміг павесялела –\\
З плеч звалілася гара...\\
Самастойна тыдзень цэлы\\
Быў я, за гаспадара.\\
\\
1979

 


===== Падобныя старонкі =====
  * [[ibdc.ped>урокі-жыцця-4066]]
  * [[творы/алесь-бачыла/алесь-бачыла-мама]]
  * [[творы/сяргей-грахоўскі/сяргей-грахоўскі-мама]]
  * [[ibdc.ped>мама]]
  * [[ibdc.ped>спасцігаю-мудрасць-маміных-урокаў]]