~~META:
title = Алесь Бадак — Душа
&keywords = Бадак, душа
&abstract = Чытаць верш Алеся Бадака "Душа"
&iftrue = nan
~~

====== Алесь Бадак — Душа ======
Расстралялі паэта\\
I цела вярнулі зямлі.\\
I на неба душу адпусцілі паспешна.\\
Але ўгору ўзляцеў адно пылу зажураны клін,\\
А душа засталася\\
У вершах.\\
\\
А калі тыя вершы схавалі ад зроку людзей,\\
Падалася душа вандраваць па краіне.\\
I, адкрытая свету,\\
Яна адчувала мацней\\
I любоў, і нянавісць.\\
I ў мілай Айчыне\\
\\
Зарыдала душа —

у пякельных слязах да краёў,—

Закрычала душа прад людзьмі на каленях: —\\
Што ж вы робіце з моваю\\
Вашых бацькоў і дзядоў!\\
Што ж вы так пагарджаеце\\
Вашым найменнем!\\
\\
Здрыганулася неба.\\
Сарваліся спуджана і —\\
Зіхатлівыя зоркі уніз паляцелі.\\
Толькі людзі не чуюць\\
Ні крыку,\\
Ні плачу,\\
Калі\\
Не адзета душа\\
I ні ў верш,\\
I ні ў цела!\\
\\
Расстралялі паэта\\
I цела вярнулі зямлі.\\
У трыццатыя\\
Гэта рабілі паспешна.\\
Узлятаў над Айчынаю пылу зажураны клін,\\
А душа заставалася ў вершах.

 


===== Падобныя старонкі =====
  * [[творы/янка-купала/эстэтычныя-погляды-янкі-купалы]]
  * [[ibdc.ped>пімен-панчанка]]
  * [[ibdc.ped>мясціны-коласа]]
  * [[слоўнік/паэт]]
  * [[творы/янка-купала/тэма-паэта-і-паэзіі-ў-творчасці-янкі-куп]]