~~META:
title = Адам Міцкевіч — Смерць палкоўніка
&keywords = Міцкевіч, смерць, палкоўнік, Эмілія, Плятэр
&abstract = Чытаць верш "Смерць палкоўніка" Адама Міцкевіча
&iftrue = nan
~~

====== Адам Міцкевіч — Смерць палкоўніка ======
На палянцы зялёнай, між думных бароў,\\
Дзе пад клёнам хацінка старая,\\
Бы застыў у зняменні атрад ваяроў:\\
Іхні там камандзір памірае.\\
Людзі з вёсак збіраюцца тут, ля варот.\\
Ён, палкоўнік, быў слаўны, няйначай,\\
Раз яму спагадае так просты народ,\\
Пра яго ўсё пытае ды плача.\\
Вось палкоўнік каня асядлаць загадаў\\
I прывесці бліжэй, да парога.\\
Перад смерцю яшчэ раз хоць глянуць жадаў\\
Ён на друга свайго баявога.\\
Загадаў свой прынесці паходны мундзір,\\
Свой кінжал, зброю, пояс стралецкі.\\
Ён хацеў і з рыштункам сваім, камандзір,\\
Развітацца, як колісь Чарнецкі.\\
А калі ўжо ад хаты каня адвялі,\\
Ксёндз туды ўвайшоў з панам Богам.\\
Людзі з вёсак маліцца хутчэй пачалі,\\
Ціха ўкленчыўшы перад парогам.\\
Спалатнеўшы, паўстанцы стаялі ў дзвярах.\\
Нават воі Касцюшкі былыя\\
Што прайшлі ўсе агні, агрубелі ў баях,\\
Слёз сваіх не хавалі, сівыя.\\
Рана-рана ў капліцы званіць пачалі.\\
Ды хаваць камандзіра жаўнеры\\
Не змаглі: наляцелі якраз маскалі...\\
У капліцы для ўсіх — насцеж дзверы.\\
Там ляжаў ён на лаве — ў спакоі чало.\\
У руках яго — крыж, збоч — нягнуткі\\
Нож-кінжал і ружжо, ва ўзгалоўі — сядло.\\
Люд дзівіўся: такі маладзюткі!\\
Ды чаму твар дзявочы ў байца? Два грудкі...\\
Хто ж мог знаць, што баёў завадатар\\
Быў... дзяўчынай! Была — слёз не трэба, жанкі, —\\
То ліцьвінка Эмілія Плятэр!\\
\\
1832

 


===== Падобныя старонкі =====
  * [[творы/алесь-гарун/алесь-гарун-на-смерць]]
  * [[творы/васіль-быкаў/васіль-быкаў-мёртвым-не-баліць]]
  * [[творы/адам-міцкевіч/творчасць-адама-міцкевіча]]
  * [[творы/уладзімір-караткевіч/уладзімір-караткевіч-ладдзя-роспачы]]
  * [[творы/уладзімір-дубоўка/уладзімір-дубоўка-ведаю-што-і-я-памру-як]]