~~META:
title = Адам Міцкевіч — Да Нёмна
&keywords = вобраз, радаводная, нёман, рэчка, кахання, часткі, нёмана, аўтар, паэта, лаура
&abstract = Чытаць санет Адама Міцкевіча "Да Нёмна". Адказы на пытанні да верша
&iftrue = nan
~~

====== Адам Міцкевіч — Да Нёмна ======
Нёмне, рэчка мая радаводная, дзе\\
Тыя воды, што браў я ў маленстве ў далоні,\\
Па якіх потым плыў у самотным палоне\\
Сэрца ахаладзіць, што зайшлося ў нудзе?\\
\\
Цень красы тут Лаура сачыла ў вадзе,\\
Валасы заплятала і ўквечвала скроні,\\
Вобраз вабны яе ў срэбных хваляў на ўлонні\\
Я слязамі ў запале муціў у жудзе.\\
\\
Радаводная рэчка мая, дзе твае\\
Маладыя крыніцы, што білі няспынна,\\
Дзе нявінных гадоў навіна і правіна?\\
\\
Дзе бунтоўнасць, якой мне цяпер не стае?\\
Дзе Лаура мая? дзе былая сябрына?..\\
Знікла ўсё, што ж не высахлі слёзы мае!

\\
Пераклад [[постаці/рыгор-барадулін|Рыгора Барадуліна]]

\\
\\
**Адказы на пытанні:**\\
1. Для лірычнага героя Нёмана – месца, дзе ён правёў маленства і адчуў горыч першага непадзеленага кахання. Нёман – спрадвечны пейзажны вобраз нашай геаграфічнай і этнічнай прасторы, які трывала замацаваўся ў нацыянальнай літаратуры як апазнавальны сімвал беларускага краю. Гэты гідронім у [[творы/адам-міцкевіч/творчасць-адама-міцкевіча|творчасці Адама Міцкевіча]] выступае як [[слоўнік/топас|топас]] радзімы.\\
2. Лірычны герой звяртаецца да ракі Нёман, называючы яго "рэчкай маёй радаводнай". Паэт з любасцю і ўсхвалявана прамаўляе слова "Нёман", бо яго вобраз – гэта нібы душэўна блізкі суразмоўца, якому аўтар давярае любоўныя згадкі, сваю шчырую споведзь.\\
3. [[слоўнік/санет|Санет]] раздзелены на дзве часткі, у пачатку кожнай часткі аўтар паўтарае выраз "рэчка мая радаводная". Вобраз Нёмана з’ядноўваецца з душой паэта суладна, інтымна і адухоўлена. З ракой знітавана незабыўнае і дарагое – пачуццё кахання, вобраз каханай. Зваротак дапамагае адчуць у Нёмане не толькі суразмоўцу, але і выказніка эмоцый, пачуццяў, якія хвалююць паэта.

 


===== Падобныя старонкі =====
  * [[ibdc.ped>берагам-нёмана]]
  * [[ibdc.ped>старанная-праца]]
  * [[ibdc.ped>празрыстая-пара-восені]]
  * [[ibdc.ped>гімн-жыццю]]
  * [[ibdc.ped>каля-нёмана]]