~~META:
title = Адам Гурыновіч — Месца нячыстае
&keywords = Гурыновіч, месца, нячыстае
&abstract = Чытаць верш Адама Гурыновіча "Месца нячыстае"
&iftrue = nan
~~

====== Адам Гурыновіч — Месца нячыстае ======
Месца нячыстае, што і казаць,\\
Мне гэта месца знаёма.\\
Відзіш,там крыж адзінокі відаць −\\
Гэта магілка Пахома.\\
Хто ж той Пахом? Гэта ж панскі ляснік.\\
Лет таму дваццаць ці болей\\
Жыў ён у хатцы, быў чэсны старык,\\
Звідзеўся з горкай ён доляй.\\
Праўда, быў вельмі дзіўны чалавек:\\
Смутны усё, маўчалівы.\\
Слова не скажа; камунеўдамёк,\\
Мог бы падумаць − спясівы.\\
Да разгавораў ён быў не ахвоч,\\
Жыў, як пустэльнік ў пустэльні,\\
Толькі пацехі, што стройная доч,\\
Любіў жа ён яе вельмі.\\
Годы праходзяць, настала пара,\\
Кася ўжо дзеўкаю стала.\\
Толькі прыходзіць к Пахому сястра,\\
Кажа, што службу дастала\\
Касі у горадзе. Бедны Пахом!\\
Жалка з дачкой расставацца.\\
Дзеля таго дык і ёй з старыком\\
Не век векаваць жа, прызнацца.\\
Можа, гады цераз два ёй ізноў\\
Трэба вярнуцца на лета.\\
Кася не тая вярнулась дамоў:\\
Стройна, як пані адзета.\\
Касю увідзеў і кажа Пахом:\\
“Віджу, што стройныя хусты...\\
Толькі ці чэсным ідзеш ты пуцём,\\
Можа, дарогай распусты?”\\
Кася спусціла тут вочы далоў,\\
Усё адгадаць тут не трудна.\\
Але стары нават рэчы не вёў\\
I падарункі ад дочкі прыняў,\\
Нават слаўцом не забідзеў,\\
А валасы, малючыся, ён рваў,\\
Toe сам Бог толькі відзеў.\\
Кася паехала. Стары ляснік\\
Услед паглядзеў ёй угрума,\\
Смутна сівой галавою панік,\\
Думае горкую думу.\\
Часта Пахом сваю доч ўспамінаў,\\
Усё таскаваў і маліўся,\\
Дзеля таго да канца не стрымаў,\\
Ночнай парой удавіўся.\\
Месца нячыстае!\\
Усякі із нас\\
Міма з малітвай праходзіць.\\
Кажуць жа людзі: у поўнач якраз\\
Нехта тут, плачучы, блудзіць.

 


===== Падобныя старонкі =====
  * [[постаці/адам-гурыновіч]]
  * [[творы/адам-гурыновіч/адам-гурыновіч-што-ты-спіш-мужычок]]
  * [[творы/адам-гурыновіч/творчасць-адама-гурыновіча]]
  * [[творы/адам-гурыновіч/адам-гурыновіч-дзякуй-табе-браце-бурачок]]
  * [[творы/адам-гурыновіч/адам-гурыновіч-лірыка]]