~~META:
title = Адам Гурыновіч — Да жніва
&keywords = Гурыновіч, жыта, жніво
&abstract = Чытаць верш "Да жніва" Адама Гурыновіча
&iftrue = nan
~~

====== Адам Гурыновіч — Да жніва ======
— А пайду ж я, маці,\\
У поле жыта жаці!\\
Жыта зелянее,\\
Колас налівае,\\
Вецер з ніўкі вее —\\
Жнеек прызывае:\\
— Ды ўставайце, жнейкі,\\
Дзеўкі маладзенькі!\\
Ды скарэй вастрыце\\
Ржавыя сярпочкі,\\
Ды барзджэй пачніце\\
Вузенькі шнурочкі.\\
Бо пачну гуляці,\\
Ніўку калыхаці:\\
Досыць табе, ніўка,\\
У полі красавацца;\\
Пара табе, ніўка,\\
У гумно схавацца!\\
— Ціха ж, вецер, ціха!\\
Не рабі ж ты ліха, —\\
Плача ніўка, плача,\\
Гнецца каласамі,\\
Не відзіць — не бачыць\\
Жнеечак з сярпамі.\\
— Ой! і дзе ж вы, жнейкі,\\
Дзеўкі маладзенькі?\\
Вецер каласенькі\\
Хоча вытрасаці,\\
Зерняткі паўненькі\\
У зямлю пакідаці.\\
— Ціха ж, ніўка, ціха,\\
Не рабі ж нам ліха.\\
Рукі ўжо памлелі\\
Граблямі махаці,\\
Яшчэ ж не паспелі\\
Сена паграбаці.\\
Пажджы ж, ніўка, трошка.\\
Справімся нямножкі,\\
Сянцо дазбіраем\\
I дамоў пазвозім,\\
У тарпу наскладаем —\\
Тады сярпы возьмем.

 


===== Падобныя старонкі =====
  * [[ibdc.ped>у-жніво]]
  * [[творы/адам-гурыновіч/адам-гурыновіч-лірыка]]
  * [[творы/янка-купала/янка-купала-жніво]]
  * [[ibdc.ped>жніво]]
  * [[ibdc.ped>жніво-уланская]]