~~META:
title = Адам Гурыновіч — Вясна
&keywords = вясна
&abstract = Чытаць верш Адама Гурыновіча "Вясна"
&iftrue = nan
~~

====== Адам Гурыновіч — Вясна ======
Ты ізноў да нас вярнулась,\\
Бледнай восені сястрыца!\\
Белай сукняй апранулась,\\
Ты румяна, светлаліца!\\
Ты адкуль прыйшла, мілая?\\
Дзе жыла-была далёка?\\
Мы це ждалі, дарагая,\\
Выглядалі смутным вокам.\\
Зналі мы, што ты вярнешся,\\
Край не кінеш нешчаслівы,\\
Залатым лучом пральешся\\
На палі, лугі і нівы.\\
I лучом тваім цяпленькім\\
Аджыла ізноў зямліца,\\
Зацвіў цветачак красненькі,\\
Заспявала ў лузе пціца.\\
Скора ластаўкі гняздзечкі\\
Пад страхой начнуць звіваці,\\
I бацян зляціць да рэчкі\\
Розных гадаў там шукаці.\\
Скора ў поле з песняй звонкай\\
Ратаі пайдуць араці,\\
I пад песню жаваронка\\
Прасіць стануць Божай Маці,\\
Каб жытцо было буйное,\\
Сенаваць каб пры пагодзе,\\
Каб ўрадзіла не благое\\
Усё у полі і гародзе.\\
А як збяром усё з поля −\\
У гумно ў тарпу паложым,\\
Дык памолімся ў касцёле\\
I табе ахвяру зложым.

 


===== Падобныя старонкі =====
  * [[творы/адам-гурыновіч/адам-гурыновіч-што-ты-спіш-мужычок]]
  * [[постаці/адам-гурыновіч]]
  * [[творы/адам-гурыновіч/адам-гурыновіч-дзякуй-табе-браце-бурачок]]
  * [[творы/адам-гурыновіч/адам-гурыновіч-лірыка]]
  * [[творы/адам-гурыновіч/творчасць-адама-гурыновіча]]