~~META:
title = Ідэалізацыя
&keywords = ідэалізацыя, спосаб
&abstract = Выкарыстанне ідэалізацыі ў літаратуры
&iftrue = nan
~~

====== Ідэалізацыя ======
Ідэалізацыя (ад франц. іdealisation) — уяўленне або адлюстраванне пэўнай з’явы ў лепшым выглядзе, вылучэнне толькі станоўчых бакоў гэтай з’явы.\\
Спосабам ідэалізацыі карысталіся пісьменнікі-рамантыкі, якія малявалі сваіх герояў незвычайна смелымі, высакароднымі, г. зн. паказвалі іх у адпаведнасці з сваім эстэтычным ідэалам, вельмі ярка, кантрастна выяўляючы гэты ідэал.\\
Спосаб ідэалізацыі прыйшоў у літаратуру з вуснай народнай паэзіі, з народных легенд, гераічных песень, казак, былін, якім ён асабліва ўласцівы.\\
У беларускай літаратуры спосабам ідэалізацыі карысталіся і карыстаюцца многія пісьменнікі. Выразны прыклад знаходзім у паэме [[творы/янка-купала/янка-купала-бандароўна|Янкі Купалы «Бандароўна»]] ў абмалёўцы вобраза Бандароўны:

Хараства такога ў свеце\\
Не было, не будзе;\\
Аб ёй людзі гаварылі,\\
Як аб нейкім цудзе.\\
Як маліны, яе губкі,\\
А твар, як лілея,\\
Як дзве зоркі, яе вочкі,\\
Гляне — свет яснее.

Iдэалізацыя мае і іншае значэнне — прыхарошванне рэчаіснасці, затушоўванне ценявых бакоў, супярэчнасцей жыцця.