~~META:
title = Шматпрыназоўнікавасць
&keywords = шматпрыназоўнікавасць
&abstract = Што такое шматпрыназоўнікавасць? Прыклады выкарыстання шматпрыназоўнікавасці
&iftrue = nan
~~

====== Шматпрыназоўнікавасць ======
Шматпрыназоўнікавасць — стылістычны прыём, асаблівасцю якога з’яўляецца ўжыванне некалькіх аднолькавых прыназоўнікаў у вершаваным радку. Звычайна той самы прыназоўнік ставіцца перад назоўнікам і перад азначаемым словам, што адносіцца да гэтага назоўніка.\\
Вось прыклад з народнай песні:

Ой, на рэчцы на быстранькай,\\
Ой, на кладачцы на гібенькай...

\\
Шматпрыназоўнікавасць ужыў [[постаці/янка-купала|Янка Купала]] ў пачатковай страфе другой часткі паэмы [[творы/янка-купала/янка-купала-курган|«Курган»]]:

На гары на крутой, на абвітай ракой,\\
Лет назад таму сотня ці болей,\\
Белы хорам стаяў, недаступнай сцяной\\
Грозна, думна глядзеў на прыволле.

\\
Паэт увогуле часта звяртаўся да шматпрыназоўнікавасці. Так, у вершы «Паліліся мае слёзы» ў кожнай з 5-і строфаў — па некалькі злучнікаў«на». Вось прыклад толькі з першай страфы:

Паліліся мае слёзы\\
На жывыя вербалозы,\\
На сухія ачароты,\\
На глухоты, на сляпоты...

\\
Паўтор прыназоўнікаў дапамагае надаць паэтычнаму выказванню велічнасць, узнёсласць:

Гэта было ля далёкай,

ля польскай ракі, каля Віслы,

Гэта на ціхай раўніне,

на светлым на полі было...

(К. Кірэенка. «Здалёку...»)\\
\\
З легендаў і казак былых пакаленняў,\\
З калосся цяжкога жытоў і пшаніц,\\
З сузор’яў і сонечных цёплых праменняў,\\
З грымучага ззяння бурлівых крыніц,\\
З птушынага шчэбету, шуму дубровы,\\
І з гора, і з радасці, і з усяго\\
Таго, што лягло назаўсёды ў аснову\\
Святыні народа, бяссмерця яго, —\\
Ты выткана, дзіўная родная мова.\\
([[постаці/максім-танк|Максім Танк]]. «[[творы/максім-танк/максім-танк-родная-мова|Родная мова]]»)