~~META:
title = Трохрадкоўе (тэрцэт)
&keywords = Трохрадкоўе, тэрцэт
&abstract = Трохрадкоўе (тэрцэт) як від страфы. Разнавіднасці і прыклады тэрцэтаў
&iftrue = nan
~~

====== Трохрадкоўе (тэрцэт) ======
Трохрадкоўе, або **тэрцэт** (італ. terzetto, ад лац. tertius — трэці), — [[слоўнік/страфа|страфа]], якая складаецца з трох радкоў.\\
Існуе некалькі яе разнавіднасцей: рыфмуюцца ўсе радкі (//ааа//), два радкі рыфмуюцца, адзін застаецца [[слоўнік/халасты-радок|халастым]] (//ааб, абб// ці, як у [[слоўнік/рытурнэль|рытурнэлі]], //аба//), радкі зусім не рыфмуюцца (//абв//). Прыклады гэтых відаў тэрцэтаў:

Я — кропля вялікага творчага мора,\\
Я — іскра квяцістага полымя зораў,\\
Я — водблеск нябёсных адвечных прастораў...\\
\\
Памру — не памрэ безупынная сіла,\\
Што думы пад неба да зорак насіла,\\
Што кіне вянок на нямую магілу.\\
([[постаці/змітрок-бядуля|Змітрок Бядуля]])\\
\\
Я не лічыў бы салдатам сябе,\\
Каб не гатоў быў прайсці\\
Праз няўдачы.\\
\\
Я не лічыў бы аратым сябе,\\
Каб першы град\\
Мог скасіць маю веру ў калоссе,\\
\\
І не лічыў бы паэтам сябе,\\
Каб кожны мой дзень\\
Не быў днём нараджэння.\\
([[постаці/максім-танк|Максім Танк]])\\
\\
У кожнага свае лясы і ластаўкі,\\
І песні, і жаночы голас ласкавы —\\
Яны мне найраднейшыя заўсёды.\\
\\
І зоркі нашы, і сцягі гарачыя\\
Вялікай перамогаю адзначаны —\\
Адданы ім я ўсюды і заўсёды.\\
([[постаці/пімен-панчанка|Пімен Панчанка]]. «...Зямля мая

то мяккая, то мулкая»)\\


Здараецца, у вершы асобныя трохрадкоўі спалучаюцца [[слоўнік/рыфма|рыфмай]]:

Журавель дон-н ды дон-н\\
У студні дно\\
Паліцай.\\
\\
Неба слупамі-дымамі\\
Дамы падтрымалі —\\
Не зваліцца.\\
\\
Ружавашчокай бяглянкаю\\
Просіцца ў хату клямкаю\\
Раніца.\\
(А. Шушко. «Студзень»)

\\
Часам у вершы, напісаным трохрадкоўямі, ужываюцца адначасова розныя яго віды («...У ноч такую не выходзіць звер» С. Панізніка).\\
У выглядзе [[слоўнік/манастрафа|манастрафы]] трохрадкоўі сустракаюцца не часта ([[слоўнік/трохрадковік|трохрадковік]]). Часцей яны ўваходзяць у склад больш буйной вершаванай формы (напрыклад, [[слоўнік/санет|санета]]) або звязваюцца адно з другім ланцужковымі рыфмамі (у [[слоўнік/тэрцына|тэрцынах]], [[слоўнік/віланэль|віланэлі]]).\\
Арыгінальнымі верлібравымі трохрадкоўямі напісана паэма Я. Гучка «Галіна з дрэва Кастуся».\\
У беларускай паэзіі нярэдкія творы, у якіх два трохрадкоўя, графічна аддзеленыя, аб’ядноўваюцца рыфмай у своеасаблівыя пары:

Ціха па мяккай траве\\
Сінявокая ноч прахадзіла;\\
Ціха з заснуўшых палян\\
\\
Плыў у гару і знікаў,\\
Быццам дым сіняваты з кадзіла,\\
Рэдкі, прывідны туман.\\
([[творы/максім-багдановіч/творчасць-максіма-багдановіча|Максім Багдановіч]])\\
\\
Непадкупны, светлы, чысты,\\
Ты прайшоў свой шлях цярністы,\\
Не схіліўшы галавы,\\
\\
І удумным, смелым словам\\
Ты нёс смерць ліхім намовам,\\
Брэд развейваў векавы.\\
([[постаці/якуб-колас|Якуб Колас]]. «Памяці Караленкі»)