~~META:
title = Развязка
&keywords = развязка
&abstract = Развязка як элемент кампазіцыі літаратурнага твора
&iftrue = nan
~~

====== Развязка ======
Развязка — заключны этап у развіцці дзеяння ([[слоўнік/канфлікт|канфлікту]], [[слоўнік/сюжэт|сюжэта]]) у эпічным або драматычным творы.\\
Часцей за ўсё развязка наступае ўслед за [[слоўнік/кульмінацыя|кульмінацыяй]], напрыклад у паэме [[творы/янка-купала/янка-купала-курган|Янкі Купалы «Курган»]] развязка адбываецца ў перадапошнім раздзеле твора:

Падхапілі, ўзялі гусляра-старыка,

Гуслі разам яго, самагуды;

Па-над бераг круты, дзе шумела рака,

Павялі, паняслі на загубу.

Месца выбралі здатнае, вырылі дол,

Дол тры сажні — шырокі, глыбокі;

Закапалі, убілі асінавы кол,

Далі насып тры сажні высокі.

\\
Развязка можа і супадаць з кульмінацыяй. Напрыклад, у камедыі [[творы/кандрат-крапіва/кандрат-крапіва-хто-смяецца-апошнім|Кандрата Крапівы «Хто смяецца апошнім»]] — сцэна ненаўмыснага самавыкрыцця Гарлахвацкага ў час чытання даклада, падрыхтаванага Тулягам, на вучоным савеце.\\
Развязка можа быць вынесена і ў пачатак твора.\\
Развязка адыгрывае важную ролю ў творы: ад таго, як вырашаецца канфлікт, залежыць увесь ідэйны сэнс твора. Пасля развязкі дзеянне ўжо не развіваецца. За ёй можа ісці толькі [[слоўнік/эпілог|эпілог]].