~~META:
title = Пуант
&keywords = пуант
&abstract = Што такое пуант? Асабливасци и прыклады пуанта
&iftrue = nan
~~

====== Пуант ======
Пуант (ад франц. pointe — вастрыё, востры канец) — нечаканая, рэзкая канцоўка твора, якая часта выяўляецца ў дасціпнай афарыстычнай форме.\\
Значэнне пуанта, як правіла, сэнсавае: у ім заключаны новы паварот паэтычнай думкі, своеасаблівая паэтычная «разгадка» папярэдніх радкоў, выказванне з аднаго сэнсавага плана пераводзіцца ў другі. Найбольш характэрны пуант для такіх жанраў, як [[слоўнік/байка|байка]], [[слоўнік/эпіграма|эпіграма]], [[слоўнік/анекдот|анекдот]], але маецца і ў лірычных вершах, асобных частках [[слоўнік/ліра-эпічныя-жанры|ліра-эпічных]] твораў. Вось невялікі лірычны верш [[творы/ніна-мацяш/творчасць-ніны-мацяш|Ніны Мацяш]] «Без цябе», у якім пуант падкрэслены [[слоўнік/недасказ|недасказам]]:

А мне ўсё лепей без цябе.\\
Працую — не гарую.\\
Спакойнай сіле не слабець —\\
Магу звярнуць гару я.\\
\\
Бясплённа дзень не праміне,\\
На мары не патрачу.\\
Смяюся, калі смешна мне,\\
А плачацца — не плачу.\\
\\
Так, мне ўсё лепей без цябе.\\
Жніво наспела ў часе.\\
Ні тлуму, ні трывог цяпер.\\
//...І ні хвіліны шчасця.//

Майстрам вершаванага пуанта з’яўляецца [[постаці/максім-танк|Максім Танк]]:

Уся зямля гарыць у майскай квецені.\\
Колькі год я па ёй вандраваў!\\
А сёння спыніўся:

як жа ісці

Па вуснах пякучых траў,\\
Па жывых, раскрытых вачах лотаці?\\
//Дык вось чаму птушкі лётаюць//!

\\
[[слоўнік/канцоўка|Канцоўка]] — наогул адзін з найбольш важных кампазіцыйных элементаў верша.\\
«Адным з сур’ёзных момантаў верша, асабліва тэндэнцыйнага, дэкламацыйнага, — падкрэсліваў У. Маякоўскі ў артыкуле «Как делать стихи», — з’яўляецца канцоўка. У гэту канцоўку звычайна ставяцца самыя ўдалыя радкі верша. Часам увесь верш перапрацоўваем, каб толькі была апраўдана такая перастаноўка»