~~META:
title = Полымя
&keywords = Полымя
&abstract = Аб’яднанне беларускіх пісьменнікаў "Полымя"
&iftrue = nan
~~

====== Полымя ======
«Полымя» – аб’яднанне беларускіх пісьменнікаў. Існавала ў Мінску са снежня 1927 г. да 27.5.1932. Ініцыятары стварэння і члены: [[постаці/янка-купала|Янка Купала]], [[постаці/якуб-колас|Якуб Колас]], [[постаці/цішка-гартны|Цішка Гартны]], М. Грамыка, [[постаці/алесь-гурло|Алесь Гурло]], [[постаці/уладзіслаў-галубок|Уладзіслаў Галубок]], Янка Нёманскі, М. Піятуховіч, А. Сянкевіч, а таксама нядаўнія члены «[[слоўнік/маладняк|Маладняка]]» [[постаці/міхась-чарот|Міхась Чарот]], [[постаці/міхась-зарэцкі|Міхась Зарэцкі]], [[постаці/анатоль-вольны|Анатоль Вольны]], [[постаці/алесь-дудар|Алесь Дудар]], А. Александровіч, В. Сташэўскі.

Асноўныя задачы: развіццё беларускай мастацкай літаратуры праз узмацненне творчай працы сваіх членаў, афармленне і замацаванне ў беларускай літаратуры пралетарскай ідэалогіі з удасканаленнем нацыянальнай формы. Значная ўвага аддавалася развіццю крытыкі, павышэнню прафесійнага ўзроўню і агульнаадукацыйных ведаў членаў аб’яднання, беражліваму стаўленню да культурнай спадчыны. Аб'яднанне наладжвала літаратурныя вечары, сустрэчы з рабочымі, арганізоўвала паездкі пісьменніцкіх дэлегацый у Ленінград, Харкаў, Кіеў і інш. Выступала за памяркоўныя адносіны і творчае супрацоўніцтва з іншымі літаратурнымі аб’яднаннямі рэспублікі, імкнулася ўраўнаважваць крайнія тэндэнцыі ў літаратурным руху канца 1920 - пач. 1930-х гг. Аднак дамагчыся гэтага не заўсёды ўдавалася з-за неаднароднасці складу аб’яднання, розных поглядаў і густаў яго членаў. Нярэдка палымянская крытыка была непаслядоўнай, неаб’ектыўнай у ацэнках літаратурных з’яў.\\
\\
\\
Крыніца: Беларуская энцыклапедыя: У 18 т. Т.12: Палікрат – Праметэй / Рэдкал.: Г. П. Пашкоў і інш. – Мн.: БелЭн, 2001. – 560 с.