~~META:
title = Музеязнаўства літаратурнае
&keywords = музеязнаўства, літаратурнае
&abstract = Што такое музеязнаўства літаратурнае? Літаратурные музеі Беларусі
&iftrue = nan
~~

====== Музеязнаўства літаратурнае ======
Музеязнаўства літаратурнае - навука, якая вывучае прынцыпы збору, захоўвання, даследавання і прапаганды арыгінальных гісторыка-літаратурных і літаратурна-мемарыяльных матэрыялаў. Гэтыя матэрыялы звычайна збіраюцца, захоўваюцца і прапагандуюцца ў спецыяльных навукова-асветных установах — музеях літаратурных.\\
На Беларусі прыватныя літаратурныя музеі былі створаны яшчэ ў ХVІ-ХVІП ст. пры дварах Радзівілаў, Сапегаў, Агінскіх, Храптовічаў, Стравінскіх і інш. У XІX ст. нямала цікавых літаратурных матэрыялаў захоўвалася ў музеі старажытнасцей К. і Я. Тышкевічаў у Лагойску, у музеі [[творы/іншае/літаратары-хіх-стагоддзя/аляксандр-ельскі|Аляксандра Ельскага]] ў в. Замосце Пухавіцкага раёна і інш. У 1919 г. пачаў працу Беларускі музей імя І. Луцкевіча ў Вільні, які ўзнік з калекцый "Нашай Нівы" і існаваў да 1946 г.\\
Сёння ў нас існуе шэраг літаратурных музеяў — дзяржаўных, грамадскіх, прыватных. Гэта Дзяржаўны літаратурны музей (Мінск), літаратурныя музеі [[постаці/янка-купала-коратка|Янкі Купалы]] (Мінск, філіялы ў Вязынцы, Ляўках, Акопах, Яхімоўшчыне), Якуба Коласа (Мінск, філіялы ў Акінчыцах, Смольні, Альбуці), Максіма Багдановіча (Мінск), [[творы/пятрусь-броўка/творчасць-петруся-броўкі|Петруся Броўкі]] (Мінск), [[постаці/францішак-багушэвіч|Францішка Багушэвіча]] (в. Жупраны Ашмянскага раёна), Дом-музей [[постаці/адам-міцкевіч|Адама Міцкевіча]] (Навагрудак, з філіялам у в. Завоссе). Па ініцыятыве школ, калгасаў, прадпрыемстваў, устаноў, прыватных асоб створана нямала грамадскіх і прыватных літаратурных музеяў ([[постаці/алаіза-пашкевіч-цётка|Цёткі]], Івана Мележа, [[постаці/аркадзь-куляшоў|Аркадзя Куляшова]], [[творы/кузьма-чорны/жыццёвы-і-творчы-шлях-кузьмы-чорнага|Кузьмы Чорнага]], [[постаці/янка-маўр|Янкі Маўра]], [[постаці/уладзіслаў-галубок|Уладзіслава Галубка]], [[постаці/браніслаў-тарашкевіч|Браніслава Тарашкевіча]], В. Таўлая, А. Блока, Ф. Дастаеўскага, Гудзевіцкі літаратурны-краязнаўчы музей у Мастоўскім раёне, Музей поліэтнічнай культуры Ракаўшчыны ў Валожынскім раёне і інш.).\\
Літаратурныя музеі арганізуюць, апрача іншага, навуковыя канферэнцыі, выдаюць зборнікі навуковых прац, уносячы тым самым адчувальны ўклад у айчыннае літаратуразнаўства. Музейныя экспанаты пра пісьменнікаў захоўваюцца таксама ў зборах дзяржаўных краязнаўчых і гістарычных музеяў, а таксама ў Беларускім дзяржаўным архіве-музеі літаратуры і мастацтва.