~~META:
title = Кода
&keywords = кода
&abstract = Што такое кода? Асаблівасці і прыклады выкарыстання коды
&iftrue = nan
~~

====== Кода ======
Кода (італ. coda — хвост, дадатак, ад лац. cauda — хвост) — звышсхемныя дадатковыя словы ці асобныя радкі ў [[слоўнік/цвёрдыя-формы-верша|цвёрдых формах верша]], а таксама у іншых раўнастрофных вершах.\\
Як правіла, кода уяўляе сабой найбольш важкія па думцы выказванні, што канцэнтруюць асноўны сэнс папярэдніх радкоў. У кодзе нярэдка знаходзіцца [[слоўнік/пуант|пуант]]. Напрыклад, у [[слоўнік/карацелька|карацельцы]] В. Шніпа «Бог» кодаю служыць адно слова, але гэта — асноўнае, стрыжнявое слова верша:

Анёлы Анёлы Анёлы Анёлы Анёлы\\
бела бела бела бела бела\\
чырвона чырвона чырвона чырвона чырвона\\
белы белы белы белы белы\\
людзі людзi людзi людзi людзi\\
//Беларусь...//

\\
Так, верш [[постаці/рыгор-барадулін|Рыгора Барадуліна]] «Русалка» напісаны звычайнымі [[слоўнік/чатырохрадкоўе-катрэн|катрэнамі]]. Кода, што ідзе за апошнім чатырохрадкоўем твора, дае думцы нечаканы паварот, дзякуючы якому глыбей успрымаецца папярэдняя страфа і ўвесь твор:

Дзяўчатанькі,

паверце слову,

Не йдзіце ў жыта за лясочкам —\\
У жыце вас русалка зловіць,\\
Яна залашчыць, заласкоча.\\
//Я лепей сам пайду...//

\\
Кодаю часам называюць заключнае [[слоўнік/двухрадкоўе|двухрадкоўе]] ў некаторых цвёрдых формах верша ([[слоўнік/актава|актава]], [[слоўнік/анегінская-страфа|анегінская страфа]]).