~~META:
title = Карацелька
&keywords = карацелька
&abstract = Карацелька і яе асаблівасці. Рубаі, хоку, каламыйкі, прыпеўкі, надпісы, вершаваныя афарызмы, фрашкі
&iftrue = nan
~~

====== Карацелька ======
Карацелька — невялікі, звычайна ад двух да шасці вершарадоў, завершаны па форме і думцы паэтычны твор.\\
Абмежаванасць аб’ёму карацелькі вядзе да лаканічнасці і падчас афарыстычнасці выказвання. Карацелькі ёсць у многіх паэтаў — [[постаці/максім-танк|Максіма Танка]], [[постаці/максім-лужанін|Максіма Лужаніна]], [[постаці/эдзі-агняцвет|Эдзі Агняцвет]], [[постаці/рыгор-барадулін|Рыгора Барадуліна]], Ю. Свіркі, [[творы/алесь-разанаў/творчасць-алеся-разанава|Алеся Разанава]] і інш. Напрыклад:

Столькі гадоў ішла да цябе!\\
Памяці поле раіцца.\\
Няўжо не дасі ў палоннай журбе\\
Хоць босай вады напіцца?..\\
([[творы/яўгенія-янішчыц/творчасць-яўгеніі-янішчыц|Яўгенія Янішчыц]])\\
\\
Хай славіцца наш беларускі род,\\
Душой з вясны, а воляю са сталі.\\
Каб з гнёздаў нам не пеўнікі на плот,\\
А горда арляняты выляталі!\\
([[творы/ларыса-геніюш/творчасць-ларысы-геніюш|Ларыса Геніюш]])\\
\\
Жывеш —\\
І дзіўна так выходзіць:\\
Ступенькі год\\
Ля ног ляглі.\\
І колькі ты\\
Ні узыходзіш,\\
А апынаешся ў зямлі.\\
(А. Сербантовіч)

\\
Да карацелек належаць [[слоўнік/рубаі|рубаі]], [[слоўнік/хоку-хайку|хоку]], [[слоўнік/каламыйка|каламыйкі]], [[слоўнік/прыпеўка|прыпеўкі]], надпісы, вершаваныя [[слоўнік/афарызм|афарызмы]], [[слоўнік/фрашка|фрашкі]] і гэтак далей. Карацельку часам называюць [[слоўнік/мініяцюра|мініяцюрай]].