~~META:
title = Двухрадкоўе
&keywords = Двухрадкоўе
&abstract = Двухрадкоўе як від страфы. Асаблівасці і прыклады ўжывання двухрадкоўяў
&iftrue = nan
~~

====== Двухрадкоўе ======
Двухрадкоўе — найбольш просты від [[слоўнік/страфа|страфы]], якая складаецца з двух радкоў, звязаных сумежнай рыфмоўкай ці клаўзацыяй (у [[слоўнік/белы-верш|белым вершы]]). Можа ляжаць у аснове манастрафічнага верша ([[слоўнік/двухрадковік|двухрадковік]]).\\
У антычнай паэзіі двухрадкоўі пэўнага памеру ўтваралі асобную страфу — [[слоўнік/элегічны-двуверш|элегічны двуверш]]. Надзвычай распаўсюджана ў паэзіі Усходу ([[слоўнік/бейт|бейт]]).\\
Двухрадкоўе нярэдка ўваходзіць як састаўная частка (у гэтым выпадку яго называюць **рыфмовай парай**) у больш буйныя страфічныя формы ([[слоўнік/чатырохрадкоўе-катрэн|чатырохрадкоўі]], [[слоўнік/шасцірадкоўе-секстэт|шасцірадкоўі]], [[слоўнік/васьмірадкоўе-актэт|васьмірадкоўі]] — //аабб, ааббвв, ааббввгг//), служыць [[слоўнік/кода|кодай]] у некаторых класічных відах строфаў (санеце шэкспіраўскага тыпу, [[слоўнік/актава|актаве]], [[слоўнік/анегінская-страфа|анегінскай страфе]]). Найчасцей жа выступае як самастойная страфа ў лірычных вершах і паэмах:

Ёсць яшчэ адзін куточак запаветны,\\
Дзе растуць, нібы грыбы, здаўна паэты.\\
\\
Там зязюлямі завуцца ўсе кукушкі,\\
Гэтым краем з Кішынёва ехаў Пушкін.\\
\\
Там прыгонных шмат паэтаў замарылі,\\
Там Міцкевіч закахаўся у Марылю.\\
([[постаці/пімен-панчанка|Пімен Панчанка]]. «Край паэтаў»)

\\
Першы ўзор беларускага двухрадкоўя сустракаем у [[творы/іншае/францыск-скарына|Францыска Скарыны]] ў прадмове да кнігі «Исход» (1517):

\\
Помни дни светые святити,\\
Отца и матку чтити!\\
\\
Не забивай ни едина,\\
И не делай греху блудна!\\
\\
Не вкради что дружнего,\\
А не давай свядецтва лживего!\\
\\
Не пожелай жены ближнего,\\
Ни имения или речи его!

\\
Двухрадкоўе было асноўнай страфой у беларускіх паэтаў-сілабістаў, хоць графічна строфы тады не аддзяляліся адна ад другой (А. Рымша, Я. К. Пашкевіч, [[творы/іншае/сімяон-полацкі|Сімяон Полацкі]] і інш.).\\
Двухрадкоўем напісаны асобныя вершы [[постаці/янка-купала|Янкі Купалы]] («Былі ў бацькі тры сыны», «[[творы/янка-купала/янка-купала-хто-ты-гэткі|Хто ты гэткі?]]»), [[постаці/якуб-колас|Якуба Коласа]] («Каля акна ў астрозе», «На рэчцы»), [[постаці/уладзімір-дубоўка|Уладзіміра Дубоўкі]] («Бацькаў наказ», «Сенненская Алеся»), Максіма Лужаніна («[[творы/максім-лужанін/максім-лужанін-мараўская-песня|Мараўская песня]]») і інш.