~~META:
title = Вольны верш
&keywords = вольны, верш
&abstract = Чаму верш называюць вольным?
&iftrue = nan
~~

====== Вольны верш ======
Вольны верш - від рыфмаванага сілаба-танічнага верша, у якім у адвольнай паслядоўнасці спалучаюцца радкі з рознай колькасцю стопаў. Не датрымліваецца страфічнай будовы. Амаль не прыбягае да сінтаксічных пераносаў: фраза ўкладваецца ў вершаваны радок, "расцягваючы" або "звужаючы" яго. Інтанацыя вольнага верша блізкая да звычайнай гутаркі, яна добра перадае развагу, дыялог. Таму найбольш арганічна вольны верш прыжыўся ў байках, жанравая своеасаблівасць якіх патрабуе нявымушанай гутаркі, інтанацыі жывога чалавечага голасу. Байкі звычайна пішуцца [[слоўнік/ямб|ямбамі]], таму вольны верш часам і называюць байкавым вершам, або вольным ямбам. Колькасць стопаў у вольным вершы хістаецца ад адной да шасці, напрыклад:

Таму ўжо будзе, мусіць, з год, /4 стапы/\\
Вучэбную стральбу праходзіла пяхота. /6/\\
Дык вось страляў аднойчы ўзвод /4/\\
Ці, можа, нават рота. /3/\\
А тут раптоўна Шэф аднекуль - шасць: /5/\\
Цікава паглядзець, а як страляе часць? /6/\\
(Кандрат Крапіва. [[творы/кандрат-крапіва/кандрат-крапіва-махальнік-іваноў|"Махальнік Іваноў"]])

\\
Апрача [[постаці/кандрат-крапіва|Кандрата Крапівы]], да вольнага верша у беларускай паэзіі звярталіся ўсе астатнія байкапісцы: У. Корбан, Э. Валасевіч, М. Скрыпка і інш. Арыгінальным вольным вершам (нерыфмаваны [[слоўнік/харэй|харэй]]) напісана паэма [[постаці/максім-танк|Максіма Танка]] "[[творы/максім-танк/ідэйны-змест-паэмы-максіма-танка-люцыян|Люцыян Таполя]]".

 


===== Падобныя старонкі =====
  * [[слоўнік/акцэнтны-чыста-танічны-верш]]
  * [[слоўнік/александрыйскі-верш]]
  * [[слоўнік/акцэнтна-складовы-верш]]
  * [[постаці/анатоль-вольны]]
  * [[слоўнік/каламыйкавы-верш]]