~~META:
title = Васьмірадковік
&keywords = васьмірадковік, верш
&abstract = Васьмірадковік як від верша. Асаблівасці і прыклады васьмірадковікаў
&iftrue = nan
~~

====== Васьмірадковік ======
Васьмірадковік — верш з васьмі вершарадоў, завершаных па метрычнаму, інтанацыйна-сінтаксічнаму малюнку і па думцы.\\
[[слоўнік/рыфмоўка|Рыфмоўка]] васьмірадковіка можа быць такой жа разнастайнай, як і рыфмоўка васьмірадковай [[слоўнік/страфа|страфы]]. Аднак найчасцей ён складаецца з двух [[слоўнік/чатырохрадкоўе-катрэн|катрэнаў]] (падчас нават аддзеленых графічна) або з [[слоўнік/шасцірадкоўе-секстэт|шасцірадкоўя]] і [[слоўнік/двухрадкоўе|двухрадкоўя]], цесна звязаных інтанацыйна і сінтаксічна, што яшчэ больш падкрэслівае сэнсавае адзінства твора.\\
Васьмірадковік звычайна мае характар [[слоўнік/медытацыя|медытацыі]], філасофскай развагі. Першая палова васьмірадковіка, як правіла, — гэта вобразная канстатацыя факта, нейкае сцвярджэнне, тэзіс, другая — абагульненне, выснова, антытэзіс і вывад. Гэтым вершам шырока карыстаўся аварскі паэт Р. Гамзатаў (кніга «Восьмистишия»). Да яго нярэдка звярталіся і беларускія вершатворцы — [[творы/максім-танк/жыццё-і-творчасць-максіма-танка|Максім Танк]], [[творы/пятрусь-броўка/творчасць-петруся-броўкі|Пятрусь Броўка]], А. Пысін і інш. [[постаці/ніл-гілевіч|Ніл Гілевіч]], у прыватнасці, выдаў кніжку вершаў, цалкам напісаную васьмірадковікам («Актавы»). Вось узоры сучасных васьмірадковікаў:

Калі каханне абвянчае\\
Жаданай згодай маладых,\\
Свайго сумлення не хавае\\
Яно ад позіркаў чужых.\\
А звяжа шлюбам маладая\\
Сябе з нялюбым і старым,\\
Свайго сумлення не схавае\\
Яна за прозвішчам чужым.\\
([[постаці/аркадзь-куляшоў|Аркадзь Куляшоў]])\\
\\
А страціць годнасць — невыносна,\\
Які б ні быў там дабрадзей...\\
Глядзіце знізу ўверх на сосны,\\
На воблакі.\\
Не на людзей.\\
А калі вас уздыме слава,\\
Аб гэтым думайце радзей...\\
Глядзіце зверху ўніз на травы\\
Ці на ваду.\\
Не на людзей.\\
([[постаці/пімен-панчанка|Пімен Панчанка]])\\
\\
Жыццё маё ў двухколерным свячэнні,\\
Як доўгі фільм. Я — аўтар і глядач.\\
Перада мною пошукі, здзяйсненні\\
І кіламетры сумныя няўдач.\\
І ў чымсьці каешся пасля аглядкі,\\
І знойдзеш чым сумленне суцяшаць.\\
Відаць, не першы ты, хто ўсе выдаткі\\
Хацеў бы на мінулае спісаць.\\
([[постаці/аляксей-пысін|Аляксей Пысін]])